काठमाडौं । आज बसेको प्रतिनिधिसभा बैठक सभामुख र उपसभामुख दुवै अनुपस्थित भएपछि भक्तपुरबाट निर्वाचित प्रतिनिधिसभा सदस्य गंगालक्ष्मी अवाल ले सञ्चालन गर्नुभएको छ। बैठक सञ्चालनका क्रममा उहाँले कार्यसूचीअनुसार संसदको कारबाही अघि बढाउनुभएको थियो।
सभामुख र उपसभामुख अनुपस्थित रहेकाले प्रतिनिधिसभाको नियमावलीअनुसार ज्येष्ठ सदस्य वा तोकिएको सदस्यले बैठक सञ्चालन गर्ने व्यवस्था छ। सोही व्यवस्थाअनुसार सांसद अवालले बैठकको अध्यक्षता गर्दै सांसदहरूलाई बोल्ने समय उपलब्ध गराउनुभएको थियो।
बैठकमा विभिन्न मन्त्रालयसँग सम्बन्धित विषय, समसामयिक राजनीतिक मुद्दा तथा जनसरोकारका विषयमा सांसदहरूले धारणा राखेका थिए। बैठक शान्तिपूर्ण रूपमा सञ्चालन भएको र कार्यसूचीका विषयमा छलफल अगाडि बढाइएको संसद सचिवालयले जनाएको छ।
सांसद गंगालक्ष्मी अवालले पहिलोपटक प्रतिनिधिसभा बैठक सञ्चालन गर्नुभएको भन्दै केही सांसदहरूले शुभकामना व्यक्त गरेका थिए। संसद बैठक नियमित कार्यतालिकाअनुसार नै अघि बढाइएको बताइएको छ।
