हिमांशु राय, झापा।भूमि समस्या समाधान आयोग जिल्ला समिति इलाममार्फत भूमिहीन दलित, भूमिहीन सुकुमवासी तथा अव्यवस्थित बसोबासीको व्यवस्थापन कार्यक्रमअन्तर्गत ३७८ परिवारलाई जग्गाधनी प्रमाणपत्र वितरण गरिएको छ।
जिल्ला समितिका संयोजक प्रकाश अधिकारीका अनुसार आवश्यक सबै कानुनी प्रक्रिया पूरा गरी हालसम्म ४४५ परिवारले उपभोग गर्दै आएको जग्गा दर्ता गर्ने निर्णय गरिएको हो। यसक्रममा ५९३ कित्ता जग्गाको धनी प्रमाणपत्र वितरण गरिएको उनले जानकारी दिए।
आयोगका अनुसार प्रमाणपत्र वितरण तथा जग्गा दर्ता प्रक्रियाबाट हालसम्म एक करोड ८६ लाख ३१ हजार ४९५ रुपैयाँ राजस्व सङ्कलन भएको छ।
त्यसैगरी, थप ७३८ परिवारको नापजाँच, राजस्व निर्धारण तथा जग्गा दर्ता प्रक्रिया अन्तिम चरणमा पुगेको संयोजक अधिकारीले बताए।
पालिकासँगको समन्वय र सहकार्यमा जिल्लाभरबाट कुल २० हजार १७४ निवेदन सङ्कलन गरिएको थियो। तीमध्ये भूमिहीन दलिततर्फ २४८, भूमिहीन सुकुमवासीतर्फ ८५७ तथा अव्यवस्थित बसोबासीतर्फ १८ हजार ९१० निवेदन परेका छन्। हाल १ हजार ९२६ निवेदन प्रमाणीकरण प्रक्रियामा रहेको आयोगले जनाएको छ।
