खाेटाङ। खोटाङ जिल्लाको हलेसी तुवाचुङ नगरपालिका ले काठमाडौं उपत्यकाबाट विस्थापित आफ्ना नागरिकलाई गाउँ फर्काउन महत्वपूर्ण पहल गरेको छ। नगर कार्यपालिकाको निर्णयअनुसार, आफ्नै जग्गा हुँदाहुँदै पनि घर नभएका परिवारलाई आवास निर्माणमा सहयोग उपलब्ध गराइने भएको हो।
हालै काठमाडौं उपत्यका भित्रका सुकुम्बासी बस्ती हटाइएपछि धेरै नागरिक विस्थापित भएका छन्। तीमध्ये हलेसी तुवाचुङ नगरपालिकाका बासिन्दा समेत प्रभावित बनेका छन्, जसले वर्षौंदेखि संघर्षपूर्ण जीवन बिताउँदै आएका थिए।
नगरपालिकाले यस्तो कठिन अवस्थामा परेका आफ्ना नागरिकप्रति गहिरो सहानुभूति व्यक्त गर्दै सुरक्षित आवासको आवश्यकता महसुस गरेको जनाएको छ। गाउँ फर्कन चाहनेहरूलाई सम्मानजनक जीवनयापनको अवसर प्रदान गर्ने उद्देश्यले यो कार्यक्रम अघि सारिएको हो।
मिति २०८३ साल वैशाख २३ गते बसेको नगर कार्यपालिका बैठकले आवास निर्माणमा आवश्यक सहयोग उपलब्ध गराउने निर्णय गरेको हो। यसले गाउँ फर्कन चाहने नागरिकहरूलाई ठोस राहत पुग्ने अपेक्षा गरिएको छ।
नगरपालिकाले आफ्नै गाउँघर फर्किनु भावनात्मक मात्र नभई दीर्घकालीन रूपमा सुरक्षित र स्थिर जीवनतर्फको महत्वपूर्ण कदम भएको उल्लेख गरेको छ। यसले गाउँको विकास र पहिचान जोगाउन समेत सहयोग पुग्ने विश्वास गरिएको छ।
यस कार्यक्रममार्फत गाउँमा बसोबास गर्ने वातावरण सहज बनाउने, सामाजिक एकता बलियो बनाउने र स्थानीय स्तरमा आर्थिक क्रियाकलाप बढाउने लक्ष्य राखिएको छ। साथै, नागरिकलाई आफ्नै माटोमा सम्मानपूर्वक जीवनयापन गर्न प्रेरित गरिनेछ।
हलेसी तुवाचुङ नगरपालिका सधैं आफ्ना नागरिकको साथमा रहने प्रतिबद्धता जनाउँदै सबैलाई गाउँ फर्केर उज्ज्वल भविष्य निर्माणमा सहभागी हुन आह्वान गरेको छ।
