भक्तपुर । बागमती प्रदेशका मुख्यमन्त्री इन्द्रबहादुर बानियाँले भक्तपुर नगरपालिकाको अवलोकन भ्रमण गर्दै यहाँको शिक्षा, स्वास्थ्य तथा सम्पदा संरक्षण क्षेत्रमा गरिएको कामप्रति उच्च प्रशंसा व्यक्त गर्नुभएको छ। नगरको समग्र विकास मोडेल उदाहरणीय रहेको उहाँको भनाइ थियो।
भ्रमणका क्रममा भक्तपुर नगरपालिकाका प्रमुख सुनिल प्रजापतिले मुख्यमन्त्री बानियाँलाई खादा तथा भादगाउँले टोपीसहित स्वागत गर्नुभएको थियो। कार्यक्रममा बोल्दै मुख्यमन्त्री बानियाँले स्थानीय तहले सीमित स्रोतसाधनका बीच पनि उल्लेखनीय उपलब्धि हासिल गरेको बताउनुभयो।
उहाँले विशेषगरी शिक्षा र स्वास्थ्य क्षेत्रमा भक्तपुर नगरपालिकाले अघि सारेका कार्यक्रमहरू प्रभावकारी रहेको उल्लेख गर्दै अन्य स्थानीय तहका लागि पनि सिकाइयोग्य रहेको धारणा राख्नुभयो। साथै ऐतिहासिक सम्पदाको संरक्षणमा गरिएको प्रयासले सांस्कृतिक पहिचान जोगाउन महत्वपूर्ण योगदान पुर्याएको बताउनुभयो।
मुख्यमन्त्री बानियाँले स्थानीय अस्पताललाई प्रादेशिक स्तरको मान्यता दिन कानुनी सुधार आवश्यक रहेको औंल्याउँदै प्रदेश सरकार यसका लागि आवश्यक सहयोग गर्न तयार रहेको प्रतिबद्धता व्यक्त गर्नुभयो। स्वास्थ्य सेवाको पहुँच र गुणस्तर वृद्धिमा प्रदेश सरकार सकारात्मक रहेको उहाँको भनाइ थियो।
भ्रमणका क्रममा मुख्यमन्त्री बानियाँले ख्वप अस्पताल, ख्वप कलेज तथा निर्माणाधीन अरनिको सभाभवनको समेत अवलोकन गर्नुभएको थियो। अवलोकनपछि उहाँले यस्ता पूर्वाधारले नगरको समग्र विकासमा थप टेवा पुर्याउने विश्वास व्यक्त गर्नुभयो।
