काठमाडौं — धार्मिक तथा सामाजिक अभियन्ता हरि महतमाथि चन्द्रागिरी नगरपालिका–८ मा केही युवाको समूहले सांघातिक आक्रमण गरेका छन्। आक्रमणबाट गम्भीर घाइते भएका महतको अहिले काठमाडौंस्थित टिचिङ अस्पतालमा उपचार भइरहेको परिवार श्राेतले जनाएकाे छ।
प्राप्त जानकारीअनुसार, ढाक्सी धारामा राखिएको शिलालेख तोडफोड गरिएको घटनासँग सम्बन्धित विषयमा महतले सामाजिक सञ्जाल टिकटकमा सामग्री पोस्ट गरेपछि विवाद चर्किएको थियो। सोही विषयलाई लिएर केही युवासँग भनाभन हुँदै कुटपिटमा परिणत भएको परिवार श्राेतले बताएको छ।
स्थानीयका अनुसार, अचानक भएको आक्रमणपछि महतलाई तत्काल उद्धार गरी महाराजगञ्जस्थित टिचिङ अस्पताल पुर्याइएको थियो। परिवारका सदस्यले उनको अवस्था गम्भीर रहे पनि उपचार भइरहेको र चिकित्सकको निगरानीमा राखिएको परिवार श्राेतले जानकारी दिएका छन्।
घटनामा संलग्न रहेको आरोपमा प्रहरीले तीन जना युवालाई नियन्त्रणमा लिएको छ। प्रहरी वृत्त थानकोटका अनुसार, उनीहरूमाथि आवश्यक अनुसन्धान प्रक्रिया अघि बढाइएको र घटनाको थप विवरण संकलन भइरहेको छ।
यस घटनापछि स्थानीय क्षेत्रमा त्रासको वातावरण सिर्जना भएको छ भने सामाजिक सञ्जालमा पनि यसको व्यापक चर्चा भइरहेको छ। सरोकारवालाहरूले दोषीमाथि कडा कारबाही गर्न माग गर्दै यस्ता घटनाले समाजमा नकारात्मक सन्देश फैलाउने भन्दै चिन्ता व्यक्त गरेका छन्।
