खोटाङ — जिल्लाको समग्र विकाससँग सम्बन्धित विविध मुद्दाहरूलाई लिएर उच्च तहमा महत्वपूर्ण पहल भएको छ। खोटाङ जिल्लाको भौतिक पूर्वाधार विकास, शिक्षा, स्वास्थ्य, कृषि, पर्यटन तथा राष्ट्रिय गौरवको आयोजना दूधकोशी हाइड्रोपावर लगायतका योजनाहरूमा देखिएका समस्याबारे केन्द्र सरकारको ध्यानाकर्षण गराइएको छ।
यसै सन्दर्भमा माननीय आरेन राई र श्रम संस्कृति पार्टि खाेटाङ जिल्ला अध्यक्ष प्रताप राईले सम्माननीय प्रधानमन्त्री बालेन शाह तथा अर्थमन्त्री स्वर्णिम वाग्ले सँग भेटघाट गर्दै विस्तृत छलफल गरेका हुन्। भेटका क्रममा जिल्लामा सञ्चालन भइरहेका विकास आयोजनाहरूको अवस्था, बजेट अभाव, कार्यान्वयनमा देखिएका चुनौती र समाधानका उपायबारे गहन कुराकानी भएको जनाइएको छ।
छलफलका क्रममा विशेषगरी राष्ट्रिय गौरवको आयोजनाका रूपमा रहेको दूधकोशी हाइड्रोपावर परियोजनालाई समयमै सम्पन्न गर्न आवश्यक समन्वय, बजेट व्यवस्थापन तथा नीतिगत सहयोगको विषयमा जोड दिइएको थियो। साथै शिक्षा, स्वास्थ्य र कृषि क्षेत्रमा देखिएका संरचनागत समस्या समाधानका लागि संघीय सरकारको सक्रिय भूमिका आवश्यक रहेको धारणा प्रतिनिधिहरूले राखेका थिए।
भेटका क्रममा खोटाङ जिल्लाका विभिन्न मागहरू समेटिएको मागपत्र पनि प्रधानमन्त्रीसमक्ष पेश गरिएको छ। उक्त मागपत्रमा जिल्लाको दीर्घकालीन विकास, रोजगारी सिर्जना तथा पूर्वाधार विस्तारका लागि विशेष योजना ल्याउन आग्रह गरिएको छ। प्रधानमन्त्री र अर्थमन्त्रीले उठाइएका विषयप्रति सकारात्मक रूपमा ध्यान दिने प्रतिबद्धता जनाएको श्रम संस्कृति पार्टि खाेटाङ अध्यक्ष प्रताप राईले जानकारी दिएका छन्।
