श्रीराम रानाभाट युएई। विश्वभरका कस्केली खोजी अभियान, समृद्ध जन्मथलो हाम्रो स्वाभिमान भन्ने मूल नाराका साथ सन् २०१४ मा स्थापना भएको यस समाजले १२औं स्थापना दिवस भव्यताका साथ सम्पन्न गरेको छ ।
समाजका अध्यक्ष शिवराज बस्ताकोटीको सभापतित्व तथा समाजका संस्थापक अध्यक्ष गुप्तशेखर पौडेलको प्रमुख आतिथ्यतामा सम्पन्न उक्त कार्यक्रममा विभिन्न सङ्घसंस्थाका प्रतिनिधिहरूको उल्लेख्य उपस्थिति सहित सामूहिक रुपमा १२औं स्थापना दिवस अङ्कित केक काटेर कार्यक्रमको समुद्घाटन गरिएको थियो ।
समाजका सदस्यहरू बीच रमाइलो मैत्रीपूर्ण आन्तरिक फुटबल प्रतियोगितामा संस्थापक संरक्षक एवं सल्लाहकार समूह, कार्यसमिति समूह, महिला समिति समूह तथा आजीवन सदस्य समूह गरी ४ समूहमा विभाजन गरी खेलाइएको खेलको फाइनल खेलमा महिला समिति समूह तथा संस्थापक संरक्षक एवं सल्लाहकार समूहबीच रोचक प्रतिस्पर्धामा ०४ का विरुद्ध ०६ गोल गर्दै संस्थापक संरक्षक एवं सल्लाहकार समूह प्रथम हुन सफल भएको थियो ।
कार्यक्रमका बिच समाजका उपाध्यक्ष श्रीराम रानाभाटको चेतना मुलुक गीत प्रस्तुतिले कार्यक्रमलाई थप रौनकता प्रदान गरेको थियो भने कार्यक्रम सञ्चालन समाजका महासचिव बुद्दि बहादुर रानाभाटले गरेका थिए ।
नेपाली समाज युएईका अध्यक्ष राम मोक्तान , प्रमुख अतिथि गुप्तशेखर पौडेल, संस्थापक महासचिव मनोजकुमार सैंजु लगायतका वक्ताहरूले आजका दिनसम्म समाजले गर्दै आएका सामाजिक कामहरूको प्रशंसा आगामी दिनमा पनि यस्तै कार्यहरुलाई निरन्तरता दिइयोस् भन्ने सन्देश सहितका शुभकामना व्यक्त गरेका थिए।
