कृष्ण कुँवर (कर्नेलियस) अबुधाबी — संयुक्त अरब इमिरेट्सको राजधानी अबुधाबीस्थित नेपाली नवजागृति मण्डलीमा २१औं प्रवासी नेपाली ख्रीष्टियन आराधना (NOCF – Nepali Overseas Christian Fellowship) भव्यताका साथ सम्पन्न भएको छ।
मंसिर १६ गते, मंगलबार (डिसेम्बर २) का दिन बिहान ९ बजेदेखि बेलुका ४:३० बजेसम्म मुसाफा वर्कर भिलेज–५ नजिक अवस्थित नवजागृति मण्डलीमा आयोजित सो कार्यक्रममा नवजागृति मण्डली, असल गोठालो मण्डली सारजाह, लगाएत युएईका विभिन्न मण्डलीका अगुवा तथा विश्वासीहरूको सहभागिता रह्यो।
यस वर्षको उत्सव युएईको राष्ट्रिय दिवसको सार्वजनिक बिदाको दिन आयोजना गरिएको थियो।
कार्यक्रमका लागि तय गरिएको सभाहल पाहुनासहित ४५० भन्दा बढी विश्वासीहरूले भरिएर उत्सव निकै उल्लासमय बनेको थियो। उक्त उत्सवमा पास्टर कमल थापा, कविता थापा, एल्डर करण पुन, डिकन सुवास थापा र प्रचारक कृष्ण कुँवर गरी पाँच जनाको दीक्षान्त सम्पन्न भयो।
एन.ओ.सी.एफ.का अध्यक्ष तथा युएई सरकारले मान्यता प्रदान गरेका पास्टर गोपाल पुलामीको अध्यक्षतामा सम्पन्न कार्यक्रमको मुख्य वक्ता लोगोस बाइबल कलेजका संचालक रेभ.डा. हेमसागर रसाईली थिए।
“मानिस जातिलाई उद्धार किन आवश्यक छ? र उद्धार कसरी प्राप्त हुन्छ?” भन्ने विषयमा बाइबल धर्मशास्त्र यहून्ना १४:६ — “बाटो, सत्य र जीवन म नै हुँ, मद्वारा बाहेक कोही पनि पिताकहाँ पुग्न सक्दैन” — लाई आधार बनाई प्रकाश पारेका थिए।
परमेश्वरले मानव जातिलाई असीम प्रेम गर्नुहुन्छ। मानिसले गरेको धार्मिक कर्म मात्रैले पापबाट छुटकारा पाउन नसकिने हुँदा, परमेश्वरले आफ्ना पुत्र प्रभु येशू ख्रीष्टलाई पापको दण्डस्वरूप बलिदानको रूपमा यस संसारमा पठाउनुभयो।
येशू ख्रीष्टको मृत्यु र पुनरुत्थानमा विश्वास गर्नेहरूका पाप क्षमा भई अनन्त जीवन प्राप्त हुने सत्यलाई वचनद्वारा स्पष्टसँग प्रस्तुत गरिएको थियो।
