मकवानपुर । शैक्षिक प्रमाणपत्र किर्ते गरी नक्कली डकुमेन्ट पेस गरेर पत्रकार महासंघको सदस्यता लिएका मकवानपुरका २ जनाको सदस्यता खारेज गर्ने निर्णय भएको छ ।
अरुलाई प्रश्न गर्दै जवाफदेहिता माग्ने पत्रकारले नै न्यूनतम योग्यता समेत पूरा नगरी सदस्यता लिएको प्रमाण प्राप्त भएपछि सूचना चाैतारी डट कम अनलाइनले समाचार ब्रेक गरेको थियो ।
मकवानपुरे पत्रकारद्वारा शैक्षिक प्रमाणपत्र कीर्ते, महासंघ मौन
महासंघको शुक्रबार बसेको कार्यसमिति बैठकले महासंघका कार्यसमिति सदस्य रहेका रातोपाटी डटकमका बागमती प्रदेशका व्युरो प्रमुख श्यामलाल दुलाल (गणेश) र अर्का कार्यसमिति सदस्य रहेकी न्यूज २४ टेलिभिजन र नेपाल खबर डकमकी प्रदेश संवाददाता कृष्णा बिष्ट (सुनिता)को सदस्यता खारेज गर्ने निर्णय गरेको हो । बिष्टले अर्काको दशजोड २ तहको शैक्षिक प्रमाणपत्र इडिट गरी महासंघको सदस्यता लिएकी थिइन् भने दुलालले दशजोड २ पास गर्नु एक वर्ष अगावै सदस्यता लिएका थिए ।
यद्यपि दुलालले समेत किर्ते गरी सदस्यता लिएको भएपनि यो विषय बाहिरिएपछी महासंघकै पदाधिकारीसंगको मिलेमतोमा डकुमेन्ट गायब पारेका थिए । महासंघको कार्यसमिति सदस्य समेत रहेका दुवैजना निर्वाचनमा प्रेस युनियन–प्रेस चौतारी गठबन्धनबाट विजयी भएका थिए । हामीलाई प्राप्त डकुमेन्टको आधारमा न्यूज ब्रेक गरेपछि सम्बन्धित व्यक्तिसहित केहीले के को आधारमा समाचार लेखेको भन्दै धम्काउने प्रयास समेत गरेका थिए । हामीले सप्रमाण रहेको भन्दै सरोकारवाला निकायमा जान अनुरोध गरेका थियौं ।
नक्कली डकुमेन्ट पेश गरेर सदस्यत लिएकाहरुले शुक्रबारको कार्यसमिति बैठकमा महासंघ मकवानपुर अध्यक्ष बालकृष्ण अधिकारीसहित केही पदाधिकारीलाई उल्टै ठूलो श्वर गरेका थिए । ‘जो चोर उसको ठूलो श्वर भनेझैं किर्ते गर्ने बिष्टजीले लाजै पचाएर महासंघको बैठकमा उपस्थित भएर अध्यक्षज्यूसंग उल्टै ठूलो कुरा गर्ने र धम्काउन खोज्नुभो’, एक पदाधिकारीले भने,’अर्कालाई प्रश्न गर्ने हामी पत्रकारमाथि प्रश्न उठ्दा पनि साथीहरु शानले हिन्नुभएको देख्दा उदेक लाग्यो ।’ कृष्णा बिष्ट सुनिताले नक्कली डकुमेन्ट पेश गरेर सदस्यता लिएको र श्यामलाल दुलाल गणेशले सदस्यता लिएपछिको वर्षको डकुमेन्ट पेश गरेको पाइएकोले दुवैलाई साधारण सदस्य समेत नरहने गरी हटाइएको ती पदाधिकारीले बताए ।
यो सँगै उनीहरु महासंघको कार्यसमिति सदस्यबाट समेत हटेका छन् । गठबन्धनबाट विजयी भएपनि तत्कालिन समयमा प्रेस युनियनबाट विद्रोह गरेर अध्यक्षका उम्मेदवार बनेका पोष्टराज कुमार अधिकारीलाई मतदान गरेको र गठबन्धनका केही उम्मेदवारलाई हराउन सफल भएपछि आफूलाई ‘शक्तिशाली’ ठान्दै आएका दुलाल र विष्ट यस विषय मिलाउन नसकेपछि हायलकायल बन्दै आएका थिए ।
यस विषयमा जिल्ला प्रशासन कार्यालय र अख्तियार दुरुयोग अनुसन्धान आयोगसम्म निवेदन परेको जानकारीमा आएको छ । महासंघको सदस्यबाट हटेपनि अब उनीहरुलाई सरकारी कागजात किर्ते मुद्दामा अनुसन्धानसहित कारबाही हुनुपर्ने महासंघकै पदाधिकारीहरुकोआग रहेको छ ।
