गोरखा । हालै परेको बेमौसमी वर्षाले बारपाक सुलिकोट गाउँपालिकाका कृषकहरूले काटेर राखेका धानमा व्यापक क्षति पुर्याएपछि गाउँपालिकाले स्थलगत अनुगमन गरी क्षतिको विवरण सङ्कलन गरेको छ।
गाउँपालिकाका अध्यक्ष विष्णु प्रसाद भट्ट स्वयं कृषकका खेतमा पुगेर क्षतिप्रभावको अवलोकन गर्नुभएको हो। उहाँले कृषि प्राविधिक, जनप्रतिनिधि तथा कृषकहरूको प्रत्यक्ष सहभागितामा धान क्षतिको विवरण सङ्कलन गर्न निर्देशन दिनुभएको छ।
गाउँपालिकाका प्रवक्ता शुभ प्रभात नेपाली (जित बहादुर) का अनुसार पालिकाका आठ वडामध्ये वडा नं. १ र २ (बारपाक गाउँ) मा धानखेती हुँदैन भने बाँकी ३, ४, ५, ६, ७ र ८ नम्बर वडामा धानखेती प्रमुख अन्नबालीका रूपमा गरिएको छ।
कात्तिक ११ गतेदेखि १६ गतेसम्म लगातार परेको वर्षाका कारण काटेर राखिएका धानमा ठुलो क्षति पुगेको प्रवक्ता नेपालीले बताउनुभयो।
“कृषकहरूले उन्नत जातका छिट्टै पाक्ने धान रोपेका थिए, जुन तीन महिनामै पाक्ने गर्छ। तर मुखैमा आएको अन्न नष्ट हुँदा कृषकहरूलाई ठूलो आर्थिक धक्का परेको छ,” उहाँले भन्नुभयो।
नेपाल कृषि प्रधान देश हुँदाहुँदै पनि जलवायु परिवर्तनको प्रत्यक्ष मारमा किसानहरू परेको प्रवक्ता नेपालीको भनाइ छ। उहाँले थप्नुभयो, “हाम्रो देशमा श्रमजिवी कृषकहरूले माटोमा पसिना बगाएर देश चलाइरहेका छन्, तर राज्यको प्राथमिकतामा उनीहरूको समस्या अझै पनि उपेक्षित छ।”
प्रवक्ता नेपालीले संघीय र प्रदेश सरकारसमक्ष स्थानीय तहका पहललाई समर्थन र राहतको व्यवस्था गर्न माग गर्नुभयो। उहाँका अनुसार, “गाउँपालिकाले क्षतिको विवरण सङ्कलन गरेर माथिल्लो निकायमा पठाउनेछ। प्रदेश र संघीय सरकारले स्थानीय तहका रेकर्डका आधारमा क्षतिपूर्ति र राहत प्याकेज तत्काल घोषणा गर्न आवश्यक छ।”
गाउँपालिकाले विपद्को समयमा किसानको पक्षमा कदम चालेको भन्दै प्रवक्ता नेपालीले अन्य स्थानीय तहहरूलाई पनि यसैगरी पहलकदमी र दबाब सिर्जना गर्न आग्रह गर्नुभयो।
मुख्य बुँदा:
बेमौसमी वर्षाले धानमा ठुलो क्षति। बारपाक सुलिकोट गाउँपालिकाको प्रत्यक्ष अनुगमन। अध्यक्ष विष्णु प्रसाद भट्ट र प्रवक्ता शुभ प्रभात नेपालीको सक्रियता।
स्थानीय सरकारको स्रोत अभावका कारण राहतमा कठिनाइ।संघीय र प्रदेश सरकारलाई सहयोग र राहत प्याकेजका लागि आग्रह गरिएको कार्यपालिका सदस्य तथा प्रवक्ता जित बहादुर नेपाली शुभप्रभातले जानकारी गराउनुभएको छ ।
गाउँ पालिका अध्यक्ष बिष्णु भट्ट कृषी कर्मचारी हरू सहित प्रवक्ता जितबहादुर नेपाली शुभप्रभात प्रतेक किसानको खेतमा पुगेर वर्षा बाट क्षती भएको काटीएको धान हरूको बिवरण संकलन गरिरहनुभएको छ ।
