कुमारसिंह बिष्ट, कैलाली । टीकापुरस्थित मालपोत कार्यालयमा एक सातादेखि कार्यालय प्रमुख (हाकिम) नहुँदा सेवाप्रवाह प्रभावित बनेको छ । दैनिक सेवा लिन आउने दर्जनौं सेवाग्राहीहरू कार्यालय प्रमुख नहुँदा रित्तो हात घर फर्किन बाध्य छन् । सेवाग्राहीहरूले यसबारेमा गुनासो गर्दै सरकारको ध्यानाकर्षण गराएका छन् ।
सुदूरपश्चिम प्रदेश सरकार, संघीय सरकार तथा हेलो सरकारको गम्भीर ध्यान जाओस् भन्ने जनताको माग छ । नेपाल सरकार अन्तर्गत भूमि व्यवस्था, सहकारी तथा गरिबी निवारण मन्त्रालयको भूमि व्यवस्थापन तथा अभिलेख विभागले रिक्त कार्यालय प्रमुख पदमा यथासिघ्र व्यवस्था मिलाउन जरुरी छ ।
मालपोत कार्यालयमा कार्यालय प्रमुख नहुँदा मेरो पनि एक हप्तादेखिको काम रोकिएको छ । जनताको सेवा गर्नुपर्ने सरकारले यति ठूलो लापरवाही गर्नु गम्भीर विषय हो । यसले सुदूरपश्चिमप्रति केन्द्र सरकारले चरम लापरवाही गरेको मान्न सकिन्छ ।
सरकारी कार्यालयको यस्तै ढिलासुस्ती र लापरवाहीले गर्दा देशका युवाहरू निराश छन् र विदेशिन बाध्य पनि छन् । नेपालमै केही गर्न चाहने युवाहरू सरकारी कार्यालयहरूको यस्तै रवैयाका कारण निरुत्साहित भइरहेका छन् ।
