काठमाडौं । द्वन्द्वकालमा राज्यको दमनका कारण हत्या गरिएका पत्रकार कृष्ण सेन ‘इच्छुक’ को २३ औं स्मृति दिवसका अवसरमा नेपाल पत्रकार महासंघले आज एक श्रद्धाञ्जली सभाको आयोजना गरेको छ । महासंघले काठमाडौंको सञ्चारग्राममा आयोजना गरेको कार्यक्रममा विभिन्न सञ्चारकर्मी, मानवअधिकारकर्मी, लेखक, राजनीतिक विश्लेषक तथा इच्छुकका शुभचिन्तकहरूको उपस्थिति थियो ।
कार्यक्रममा वक्ताहरूले पत्रकार इच्छुकको योगदानको चर्चा गर्दै उनलाई विचार र लेखनको माध्यमबाट परिवर्तनको पक्षधर योध्दा रुपमा स्मरण गरेका थिए । उनीद्वारा सञ्चालित पत्रिका मार्फत राज्यसत्ता र व्यवस्थाको कठोर आलोचना गर्ने साहसिक कार्यले उनी जनपक्षीय पत्रकारिताका प्रतीक बनेको उल्लेख वक्ताहरूले गरेका थिए ।
नेपाल पत्रकार महासंघका अध्यक्षका अनुसार, इच्छुकको योगदान केवल पत्रकारिता क्षेत्रमा सीमित नभई सामाजिक रुपान्तरणको अभियानमा समेत उल्लेखनीय थियो । “उनले कलमको माध्यमबाट जनताको आवाज बुलन्द गरे । आजको सन्दर्भमा उहाँको बलिदान झन् सान्दर्भिक छ,” अध्यक्षले भने ।
कार्यक्रममा इच्छुकको स्मृतिमा दुई मिनेट मौनधारण गरिनुका साथै उहाँका लेख र विचारमाथि विमर्श पनि गरिएको थियो । वरिष्ठ पत्रकार, लेखक र मानवअधिकारकर्मीहरूले इच्छुकको जीवन, पत्रकारितामा निष्ठा र बलिदानी भावनाको उदाहरण प्रस्तुत गर्दै नयाँ पुस्ताले उहाँबाट प्रेरणा लिनुपर्नेमा जोड दिए ।
