काठमाडौं । तत्कालीन सभामुख कृष्ण बहादुर महरा संग यौन काण्डमा जोडिएकी रोशनी शाही सूर्यविनायक नगरपालिका–३ बालकोटको आफ्नै कोठाभित्र चुकुल लाएको अवस्थामा मृत भेटिएको छ ।
बालकोटको बृहस्पति मार्गस्थित लक्ष्मीश्वर महत्तोको घरमा डेरा गरी बस्ने ५० वर्षीया शाही आइतबार दिउँसो पौने दुई बजे कोठाभित्र मृत भेटिएको जिल्ला प्रहरी परिसर भक्तपुरका डिएसपी डुण्डीराज न्यौपानेले जानकारी दिनुभएको छ ।
कोठामा अरू कोही नभएको अवस्थामा मृत भेटिएकोले यस घटनाको थप छानबिन भइरहेको प्रहरीको भनाई रहेको छ ।
डेरामा शाहीका दम्पती बस्ने गरेको,उनका श्रीमान् चित्रजंग शाही विराटनगरमा रहेकाले आउन लागेको बताइएको छ ।
२०७६ असोजमा संसद सचिवालयमा कार्यरत रोशनीले तत्कालीन सभामुख महरामाथि आफूमाथि बलात्कार प्रयास गरेको आरोप लगाएकी थिइन् ।
महराले मादक पदार्थ सेवन गरेर आफू बसोबास गरिरहेको कोठामा आएर जबरजस्ती गर्न खोजेको उनको आरोप थियो । घटना सार्वजनिक भएपछि उनले सभामुख पदबाट राजीनामा दिनुपरेको थियो भने लगत्तै पक्राउ परेका थिए ।
अन्ततः २०७६ फागुनमा जिल्ला अदालत काठमाडौंले कृष्णबहादुर महरालाई सफाइ दिँदै रिहा गरेको थियो ।
