डिकेन्द्र बस्नेत, काठमाडौं – श्रमिकका समस्या समाधानको माग गर्दै एकीकृत ट्रेड यूनियन महासंघको नेतृत्वमा श्रम, रोजगार तथा सामाजिक सुरक्षा मन्त्री शरद सिंह भण्डारीलाई आज ज्ञापनपत्र बुझाइएको छ।
नेपाल सुरक्षा श्रमिक ट्रेड यूनियन र नेपाल स्वतन्त्र आउटसोर्स श्रमिक संगठनले संयुक्त रूपमा मन्त्री भण्डारीसँग सिंहदरबारस्थित कार्यकक्षमा भेट गरी आगामी आर्थिक वर्ष २०८२/८३ को बजेटमा सरकारी कर्मचारीबाहेक अन्य श्रमिकहरूको पनि न्यूनतम पारिश्रमिक वृद्धि समावेश गर्न माग गरेका हुन्।
ज्ञापनपत्र बुझाउने कार्यक्रममा महासंघका राष्ट्रिय अध्यक्ष विष्णुप्रसाद लम्साल, नेपाल सुरक्षा श्रमिक ट्रेड यूनियनका अध्यक्ष प्रेमबहादुर कार्की, उपाध्यक्ष उद्धवप्रसाद दाहाल, महासचिव वेदप्रसाद हुमागाईं र नेपाल स्वतन्त्र आउटसोर्स श्रमिक संगठनका महासचिव पूर्ण थापा सहभागी थिए।
कार्यक्रममा अध्यक्ष कार्कीले श्रमिकहरूका तलब, सुरक्षा, सामाजिक सुरक्षालगायत विविध समस्या र सुझावहरू वाचन गर्दै मन्त्रीसमक्ष राखेका थिए।
ज्ञापनपत्र ग्रहण गर्दै मन्त्री भण्डारीले श्रमिकहरूको मागलाई सरकार गम्भीरतापूर्वक लिएको बताउँदै यस्ता मागहरू पहिले औपचारिक रूपमा नआएको जनाउनुभयो। “तपाईंहरूले उठाउनु भएका मागहरू न्यायसंगत छन्, आगामी बजेटमा सकेसम्म सम्बोधन गर्नेछौँ,” मन्त्री भण्डारीले भन्नुभयो।
उहाँले रोजगारदाताबाट श्रमिकहरू शोषित हुँदा पनि मन्त्रालयमा उजुरी नआएकाले कारबाही गर्न गाह्रो भएको बताउँदै श्रमिकहरूको आवाज सरकारसम्म पुर्याउन ट्रेड यूनियनहरूको सक्रियता आवश्यक रहेको उल्लेख गर्नुभयो।
महासंघका अध्यक्ष लम्सालले चालु आर्थिक वर्षमै श्रमिकको न्यूनतम पारिश्रमिक वृद्धि हुने विश्वास व्यक्त गर्नुभयो।
