काठमाडौं । रूकुमपश्चिमको सोती घटनामा जातीय विभेदको मुद्दा बदर भएको भन्दै पीडित परिवारले न्याय परिषदमा उजुरी दिएका छन्।
घटनाका मृतक नवराज विकका बुवा मुनलाल नेपाली, गोबिन्द शाहीकी आमा भिमीकुमारी बुढाथोकी शाही र लोकेन्द्र सुनारकी आमा लक्ष्मी सुनारले बिहीबार न्याय परिषदमा पुगेर उच्च अदालत सुर्खेतका न्यायाधीशहरू सोमकान्त मैनाली र मातृकाप्रसाद भण्डारीविरूद्ध उजुरी दिएका हुन्।
उच्च अदालतले गत वैशाख १६ गते २३ जना दोषीको जन्मकैद सजाय सदर गरे पनि जातीय भेदभावको मुद्दा बदर गरेपछि पीडित परिवारले विरोध जनाउँदै आएका हुन्।
२०७७ जेठ १० मा नवराज विकसहित ६ जनाको हत्या भएको थियो। घटनामा संलग्नहरूलाई जन्मकैदको सजाय कायम राखिए पनि विभेदसम्बन्धी मुद्दा खारेज भएकोमा पीडित आक्रोशित छन्।फैसला भए पनि पूर्णपाठ भने अझै सार्वजनिक भएको छैन।
