ओखलढुंगा युथ फाउण्डेसनले ८० वर्षिया वृद्धा एकल महिला कलिमायाँ भुजेललाई खाद्यान्न र कपडा सहयोग गरेको छ । जिल्लाको सिद्धिचरण नगरपालिका –ं३ जंगले स्थित एक अति विपन्न वृद्धा महिलालाई कार्यक्रमका बीच २० हजार बराबरको खाद्यान्न र कपडा सहयोग हस्तान्तरण गरेको हो ।
युथ फाउण्डेसनले नुन, तेल, चामल, चिउरा, दाल,चाउचाउ, बिस्कुट र चिनी लगायत खाद्यान्न वृद्धाको घरैमा पुगेर सहयोग गरेको युथ फाउण्डेसनका अध्यक्ष ओमकुमार शाक्यले बताए । यस्तै वृद्धालाई बस्नको लागि समस्या भएकाले पासापुचः गुठी युकेले फाउण्डेसनलाई उपलब्ध गराएका त्रिपाल, म्याटेस, दुई ओटा ब्लाङकेट पनि वितरण गरिएको उनले बताए ।
कोरोना कहरमा एकल महिलालाई खान र बस्नको लागि सहयोग पुगोस् भन्ने हेतुले उक्त वृद्ध महिलालाई सहयोग गरेको ओखलढुंगा युथ फाउण्डेसनले जनाएको छ । उक्त महिला एकल रहेको र आफन्तहरु पनि नभएकोले एक्लेै बासको घरमा बस्दै आएको भनेर गाउँलेहबाट खबर आएकोले उक्त राहत सामाग्री लिएर फाउण्डेसन वृद्धा महिलाको घरमा पुगेको थियो ।
यसैबिच फाउण्डेसनका उपाध्यक्ष प्रबिण शाक्य र सचिव दिपक श्रेष्ठले वृद्धालाई ब्यतिगत रुपमा केही नगद, लत्ता कपडा र खाद्यान्न समेत सहयोग गरेका छन् ।
ओखलढुंगा बजारका ३० जना भन्दा माथि युवाहरूले व्यक्तिगत खर्चमा सञ्चालन गरेको फाउण्डेसनले दिन दुःखीहरूलाई विगत देखिनै सहयोग गरिरहेको छ । सामाजिक कामलाई आगामी दिनहरूमा पनि निरन्तरता दिईने फाउण्डेसनले जनाएको छ ।
