झापा। कमल गाउँपालिका अध्यक्ष हुकुमसिंह राईले बुधबार प्रधानमन्त्री केपी शर्मा ओलीसँग भेट गरी गाउँपालिकाका समस्याहरूबारे ध्यानाकर्षण गराएका छन्।
बालुवाटारस्थित प्रधानमन्त्री निवासमा आयोजित भेटका क्रममा अध्यक्ष राईले कमल गाउँपालिका विशेषगरी वडा नम्बर ३, ४, र ५ मा जंगली हात्तीको आतंक र रतुवा तथा कमल खोलाको नदी कटान नियन्त्रणको विषयमा लिखित रूपमा जानकारी गराएका छन्।
प्रधानमन्त्रीसँगको भेटमा अध्यक्ष राईले जंगली हात्तीका कारण स्थानीय बासिन्दाहरूले दैनिक ५–७ वटा घर गुमाउनुका साथै खाद्यान्न र अन्नबाली नष्ट हुने गरेको उल्लेख गरे। उनले पछिल्लो समय हात्ती आक्रमणका कारण चार जनाले ज्यान गुमाएको घटनाबारे समेत जानकारी गराए । प्रधानमन्त्री ओलीले यो समस्या गम्भीर भएको भन्दै समाधानका लागि आवश्यक पहल गर्ने प्रतिबद्धता व्यक्त गरेको अध्यक्ष राईले बताए।
अध्यक्ष राईले गाउँपालिकाका गौरवका योजनाहरूलाई आगामी आर्थिक वर्षको बजेटमा समावेश गर्नुपर्ने आवश्यकता औंल्याए। उनले भने, “प्रधानमन्त्रीज्यूकै निर्वाचन क्षेत्रमा पर्ने भएकाले यहाँका महत्वपूर्ण योजनाहरूमा समेत ध्यान पुग्नुपर्छ।”
रतुवा र कमल खोलाका कारण वर्षौंदेखि पीडित स्थानीयहरूलाई राहत दिलाउन बाँकी रहेका तटबन्ध योजनाहरू पूरा गर्न आवश्यक बजेटको माग गरिएको उनले बताए। “आगामी बजेटमा यसबारे आवश्यक सम्बोधन हुने विश्वास छ,” अध्यक्ष राईले भने।
कमल–५ स्थित मंगलबारे बजारलाई सुविधा सम्पन्न बजारका रूपमा विकास गर्न उपप्रधानमन्त्री तथा शहरी विकास मन्त्री प्रकाशमान सिंहसँग आवश्यक प्रस्ताव पेश गरिएको छ। मन्त्री सिंहले शहरी विकास योजनाअन्तर्गत बजेट सुनिश्चित गर्ने प्रतिबद्धता व्यक्त गरेको अध्यक्ष राईले जानकारी दिए।
यस्तै, कमल–२ मा सामुदायिक भवन निर्माणको योजनाबारे पनि छलफल भएको छ।
त्यस्तै, अध्यक्ष राईले युवा तथा खेलकुद मन्त्री तेजलाल चौधरीसँग भेट गरी कमल–५ मा निर्माणाधीन आदिवासी रंगशालाका लागि आवश्यक बजेटको माग गरेका छन्। उनले रंगशालाको अधुरो कम्पाउन्ड वाल, प्याराफिट निर्माण लगायतका कार्य सम्पन्न गर्न कम्तीमा १० करोड रुपैयाँ विनियोजन गर्न लिखित अनुरोध पत्र बुझाएका छन्।
