काठमाडौं । सरकारसँग भएको सम्झौता कार्यान्वयन र संसद्मा विचाराधीन विद्यालय शिक्षा विधेयक चाँडो पारित गर्नुपर्ने मागसहित शिक्षकहरूले शनिबार काठमाडौंको माइतीघरमा प्रदर्शन गरे । नेपाल शिक्षक महासंघको नेतृत्वमा भएको आन्दोलनमा करिब पाँच हजार शिक्षक उपस्थित थिए ।
५ असोज ०८० मा सरकार र महासंघबिच सार्वजनिक विद्यालयमा अध्यापनरत शिक्षकको मर्यादाक्रम कायम गर्ने, विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयकमा भएका व्यवस्थामा संसदीय प्रणाली, अभ्यास र संघीय संसद् सञ्चालनसम्बन्धी मौजुदा विधिबमोजिम प्रक्रिया अगाडि बढाउन सहजीकरण गर्ने उल्लेख छ ।
यस्तै, मावि तहको विशिष्ट श्रेणीमा बढुवाका लागि प्रथम श्रेणीमा १० वर्ष सेवा गरेको व्यवस्था गर्नुपर्ने, प्रजातान्त्रिक आन्दोलन तथा द्वन्द्व प्रभावित शिक्षकको सेवावधि गणना गर्नुपर्ने, शिक्षकलाई विनाआधार सजाय हुन नसक्ने व्यवस्था गर्ने, विगतमा निमावि द्वितीय तथा प्राथमिक द्वितीय श्रेणीसहितका पदमा खुला प्रतिस्पर्धाबाट नियुक्त भएका शिक्षकको बढुवाका लागि आवश्यक व्यवस्था गर्ने र सम्बन्धित स्थानीय तहभित्र शिक्षकको सरुवा गर्दा शिक्षकको हकमा प्रधानाध्यापकको र प्रधानाध्यापकको हकमा विद्यालय व्यवस्थापन समितिको सहमति आवश्यक पर्ने विषय समेट्नुपर्ने माग छ ।
