By Dikendra
मोरङ । पथरी शनिश्चरे नगर इसाई समाजको आयोजनामा ख्रिष्टमस शुभकामना सम्मान तथा सांगीतिक कार्यक्रम भव्यताका साथ आइतबार सम्पन्न भएको छ। ईसाई समाजले यलमवर चौकदेखि बुद्ध चौक, हुनमान मन्दिर लाइन, ट्राफिक चौक हुँदै पथरी बजार परिक्रमा गरेर पुनः यलमवर चौकमा र्यालीको समापन गरेको थियो।
कार्यक्रमका प्रमुख अतिथि नगर प्रमुख मोहन प्रसाद तुम्वापाले स्वदेश तथा विदेशमा रहेका सम्पूर्ण नगरवासीलाई ख्रिष्टमसको शुभकामना व्यक्त गर्नुभएको छ।
नगरका ३५ वटा चर्चहरूको संयुक्त सहयोगमा कार्यक्रमलाई भव्य रूपमा सम्पन्न गरिएको पथरी ईसाई समाजका अध्यक्ष पास्टर गोपाल राईले जानकारी गराउनुभयो।
कोशी प्रदेश ईसाई समाजका सल्लाहकार पास्टर रेभ. दानियल लिम्बुले येशु ख्रिस्टको बलिदानले सम्पूर्ण मानवजातिको पापको प्रायश्चित गरिदिएको सन्देश दिनुभयो।
ईसाई समुदायको चर्चित म्यूजिक ब्याण्ड हेफ्जिबाह र स्थानीय कलाकारहरूको आकर्षक नृत्यले कार्यक्रममा मनोरञ्जन थपिएको थियो ।
एक दशकभन्दा लामो समयदेखि पथरी नगरभित्र परमेश्वरको सेवामा समर्पित जीवन बिताउनुभएका अग्रज पास्टरहरूलाई प्रशंसा पत्रसहित सम्मान गरिएको थियो।
कार्यक्रममा वडाध्यक्षहरू भीम कुमार राई, विजय लिम्बु, लोककिरण न्यौपाने (लोकनाथ), उद्धवराज बस्नेत, नविन कार्की, युवा व्यवसायी एवं सुनाखरी माविका विव्यस अध्यक्ष प्रदिपकुमार राई तथा विभिन्न चर्चका पास्टरहरूको उपस्थिति रहेको थियो।
कार्यक्रमको सञ्चालन सुमन कुरुङबाङले गर्नुभएको थियो भने स्वागत मन्तव्य कार्यक्रम संयोजक पास्टर मुकुल सिंह राईले दिनुभएको थियो। ख्रिष्टमसको यस विशेष अवसरमा इसाई समाजले सामाजिक एकता र धार्मिक सहिष्णुताको सन्देश प्रवाह गरेको छ।
