By Dikendra
झापा । दमक नगर ईसाई समाजले ख्रीष्टमस पर्वको अवसरमा आगामी पुस ७ गते शुभकामना आदान-प्रदान तथा र्याली कार्यक्रम आयोजना गर्ने घोषणा गरेको छ। यस कार्यक्रमले ख्रीष्टमसको महत्वपूर्ण सन्देश—शान्ति, प्रेम, र एकता—समाजमा फैलाउने लक्ष्य राखेको छ।
बुधबार टि टाइम, दमकमा आयोजित पत्रकार भेटघाटमा, ईसाई समाज दमकले र्याली दिउँसो १२ बजे गंगानगरीबाट प्रारम्भ हुने जानकारी गराएको छ। र्याली नमुना मार्ग, फाल्गुनन्द चौक, सगरमाथा पेट्रोलपम्प हुँदै गोर्खा डिपार्टमेन्टसम्म पुगेर समापन हुनेछ। आयोजकका अनुसार, यस र्यालीमा दमक नगर र आसपासका ईसाई समुदायका हजारौं सदस्यहरूको सहभागिता रहने अपेक्षा गरिएको छ।
कार्यक्रम संयोजक पास्टर कुमार तामाङका अनुसार, “ख्रीष्टमस पर्व कुनै धर्म, जाति वा वर्ग विशेषको लागि मात्र नभई सम्पूर्ण मानवजातिका लागि पाप क्षमा, शान्ति, र समृद्धिको संदेश बोकेको पर्व हो। यसले समाजमा खुशी, उत्साह, र प्रेरणा जगाउने काम गर्छ।”
त्यसैगरी, दमक ईसाई समाजका सल्लाहकार तथा प्रशासन समन्वय समितिका संयोजक पास्टर राजकुमार राईले भन्नुभयो, “ख्रीष्टमसले समाजलाई द्वेष र भेदभावबाट टाढा राख्न र एकता, प्रेम, र सहिष्णुताको सन्देश दिन मद्दत गर्दछ।”
कार्यक्रमका प्रमुख वक्ताका रूपमा एनसिएफ नेपालका कोषाध्यक्ष तथा धरान अनुग्रह इम्मानुएल चर्चका पास्टर रेभ. हिमाल जोसेफ राईको उपस्थिति निश्चित भएको निवर्तमान अध्यक्ष तथा सामाजिक विकास उपसमिति संयोजक पास्टर आकाश थुलुङले जानकारी गराउनु भयो । साथै, दमकका चर्च र स्थानीय कलाकारहरूले गीत तथा नृत्य प्रस्तुत गर्ने कार्यक्रम पनि रहेको छ।
कार्यक्रममा समाजका अध्यक्ष पास्टर हेमन्त सुब्बा, उपाध्यक्ष पास्टर राम राई, विपत्त व्यवस्थापन उपसमिति संयोजक पास्टर युवराज गजमेर, जवान समिति अध्यक्ष एल्डर सुरज लिम्बू लगायतको उपस्थिति रहेको थियो।
शुभकामना आदान-प्रदान कार्यक्रमले समुदायमा आपसी सहकार्य र सद्भावलाई प्रोत्साहित गर्नेछ। आयोजकहरूका अनुसार, “यस ख्रीष्टमसले सबैलाई एकताबद्ध बनाउँदै समाजमा दया, प्रेम, र सहयोगको नयाँ अध्याय प्रारम्भ गर्न प्रेरणा दिनेछ।”
