By Dikendra
झापा । दमक नगर ईसाई समाजले हरेक वर्ष झै यस वर्ष पनि ख्रीष्टमसको अवसरमा प्रेम, शान्ति, आशा फैलाउने उद्देश्यका साथ आगामी पुस ७ गते ख्रीष्टमस शुभकामना आदानप्रदान कार्यक्रम आयोजना गर्ने तयारी गरेको छ। सोमबार भएको छलफलमा कार्यक्रम संयोजक पास्टर कुमार तामाङले ख्रीष्टमस पर्वको साँचो अर्थ र महत्वलाई जनसमुदायमा फैलाउने उद्देश्य राखेको कुरा व्यक्त गर्नुभयो।
दमक १ स्थित आशिष प्रेस्बिटेरियन चर्चमा भएको भेलामा
चर्चका प्रतिनिधिहरूले ख्रीष्टमसको अवसरमा रयालीको आयोजना गरेर समाजमा शान्ति र प्रेमको सन्देश फैलाउने निर्णय गरेका छन्।
रयालीपछि गोर्खा डिपार्टमेन्ट अगाडि ख्रीष्टमस शुभकामना आदानप्रदान कार्यक्रम आयोजना गरिने दमक नगर ईसाई समाजका अध्यक्ष पास्टर हेमन्त सुब्बाले जानकारी दिनुभयो।
यसको अलावा, सोही दिन समाजले हालै मनोनीत दमक नगर ईसाई समाजको विभिन्न समितिहरूको लागि प्रशिक्षण कार्यक्रम पनि आयोजना गरेको थियो। समितिहरूमा मूल समिति, आमा दिदीबहिनी, युवा, अदन बगैंचा, प्रशासन समन्वय, विपद व्यवस्थापन, संचार तथा मिडिया, र खेलकुद उपसमिति समावेश छन्। प्रशिक्षण कार्यक्रमले समितिहरूका सदस्यहरूलाई उनीहरूको कार्यक्षेत्र र जिम्मेवारीको बारेमा शिक्षा प्रदान गर्ने उद्देश्य राखेको थियो।
प्रशिक्षण कार्यक्रममा निवर्तमान अध्यक्ष पास्टर आकाश थुलुङ र सल्लाहकार पास्टर राज कुमार राईले समाजको औचित्य र उद्देश्यको बारेमा जानकारी दिएका थिए। उनीहरूले भने, “हामी सबैलाई आफ्नो जिम्मेवारीलाई आनन्दसाथ निभाउनु पर्छ र क्षेत्र अधिकारको महत्त्व बुझ्न आवश्यक छ।” साथै, समर्पण र परिश्रमको साथ समाजका सबै कार्यहरूमा भाग लिन प्रेरित गर्दै, समाजका विधान र कार्यसमितिहरूका प्राथमिक उद्देश्यहरूबारे पनि विस्तृत जानकारी दिइयो।
