झापा। धरमपुर सामुदायिक विकास संस्थाको मुख्य आयोजना अन्तर्गत स्थानीय हाटबजार, उद्यमी, व्यापारी, व्यवसायी, र युवाहरूको सामूहिक पहलमा यो महोत्सव आयोजना गरिने भएको छ। महोत्सवको तयारी र व्यवस्थापनबारे जानकारी गराउन धरमपुरमा बिहीबार पत्रकार सम्मेलनको आयोजना गरिएको थियो।
धरमपुर सामुदायिक विकास संस्थाका अध्यक्ष दुर्गा नेम्बाङले महोत्सवको उद्देश्य धरमपुर चौक र आसपासका क्षेत्रका अपराधिक गतिविधिहरूलाई नियन्त्रण गर्नु रहेको बताए। यो महोत्सव कार्तिक १२ गतेदेखि २४ गतेसम्म तिहारको अवसर पारेर सञ्चालन हुनेछ। महोत्सवमा सिसी क्यामेरा र रात्रीकालीन सडकबत्ती जडान जस्ता पूर्वाधारहरू पनि निर्माण गरिने छ।
महोत्सव सञ्चालनका लागि उपसमिति गठन गरिएको छ जसको संयोजक शुक्रराज नेम्बाङ छन्। महोत्सवमा स्थानीय जातजातिका सांस्कृतिक पहिरन र नृत्यहरू प्रस्तुत हुनेछन्। मनोरञ्जनात्मक खेलहरू पनि आयोजना हुनेछन् जसमध्ये हाउजी, पिङ, लक्की सिक्स मुख्य छन्।
राष्ट्रिय स्तरका चर्चित गायक, गायिका, तथा कलाकारहरूको पनि उपस्थित हुने भनिए पनि, पत्रकार सम्मेलनमा तिनका नाम भने खुलाइएको थिएन।
सो पत्रकार सम्मेलनमा धरमपुर सामुदायीक विकास संस्थाका उपाध्यक्ष एबम् कानून व्यवसायी ज्ञानेन्द्र तिम्सिनाका अनुसार धरमपुर महोत्सव सम्पन्न गर्न विभिन्न उपसमितिहरू गठन गरिएको छ। जसमध्ये प्रचारप्रसार, स्वयम्सेवक व्यवस्थापन, सवारी पार्किङ व्यवस्थापन, स्टल बुकिङ व्यवस्थापन आदि समावेश छन्। महोत्सव सञ्चालनका लागि अनुमानित रु १० लाख खर्च हुनेछ र उद्घाटन नगर प्रमुख मेघाहाङ थोप्राले गर्नुहुने भएको छ।
पत्रकार सम्मेलनमा शिबसताक्षी–१ का जनप्रतिनिधि (वडा सदस्य) पूर्णजङ चेम्जोङ, चलचित्र कलाकार तथा द्धन्द्ध निर्देशक धिरज परियार, स्थानीय व्यवसायी तथा कलाकार पृथ्बी बोहोरा, युवा व्यवसायी सुमन चेम्जोङ लागयतको उपस्थिति थियो ।
