खाेटाङ। दुई नगरपालिका र आठ गाउँ पालिका रहेकाे खाेटाङकाे दिक्तेल रुपाकोट मझुवागढी नगरपालिकाका उपमेयर विसन राई बिरुद्धको अपांगता भएकाहरुलाई सार्वजनिक कार्यक्रममा मानमर्दन गरेको भनि दिइएको जाहेरी उपर उपमेयर राईले अदालतमा हाजिर भई ५० हजार धरौटी तिरी तारेखमा छुटेकाछन् ।
कोशी प्रदेश सरकार, दिक्तेल नगरपालिका र करुणा फाउण्डेसनको त्रिपक्षीय साझेदारी तथा राष्ट्रिय अपाङग महासंघको सहकार्यमा सञ्चालित ‘अपाङगता रोकथाम तथा पुनः स्थापना कार्यक्रम’ अन्तर्गत जेठ ६ गते नगरको सभाहलमा भएको समिक्षा कार्यक्रममा उपमेयर राईले अपाङगता भएका व्यक्तिको अधिकार सम्बन्धि ऐन २०७४ को दफा ५३ बमोजिम कसूर गरी अन्याय गरेको भन्दै हदैसम्मको सजाय गरी उचित क्षतिपुर्ति दिलाउन जाहेरी दर्ता भएपछी उपमेयर राई अदालतमा हाजिर भई तारिखमा छुटेका हुन् ।
उपमेयर राईले सार्वजनिक कार्यक्रममा अपाङगता भएका व्यक्ति लक्षित गरी अपाङगता भएका व्यक्तिहरु राज्यको लागि बोझ भएको, यिनीहरुलाई नियन्त्रण र निर्मुल नपारी राज्यको विकास हुन नसक्ने भनि अपाङगहरु उपर सार्वजनिक रुपमा घृणा फैलाउने, हेला, अपमान गर्ने, तिरस्कार र दुव्र्यवहार गरी अपाङग भएका व्यक्तिहरु उपर उपहास र तिरस्कार गरी आत्मसम्मान पूर्वक बाँच्न पाउने अधिकारलाई निरर्थक बनाई सामाजिक रुपमा तिरस्कार र घृणा फैलाउने कार्य गरेको जाहेरीमा उल्लेख गर्दै अपाङ सेवा संघ दिक्तेल रुपाकोट मझुवागढी नगरपालिका अध्यक्ष उमेशचन्द्र आचार्य र सचिव जयनारायण कटुवालले अन्तिम हद म्यादको अघिल्लो दिन बुधबार ‘अपाङगता भएका व्यक्ति विरुद्धको कसूरमा सरकारी वकिलमार्फत प्रहरीमा जाहेरी दर्ता गराएका थिए ।
अपाङग भएका व्यक्तिहरुकोे अधिकार सम्बन्धि ऐन, २०७४ को दफा ४२ ले अपाङगता भएका व्यक्तिको हकहित संरक्षण सम्बन्धि विषयमा समन्वय गर्ने कामको लागि नगरपालिकाको समन्वय समिति संयोजक समेत कानूनी रुपमा उपमेयरलाई तोकेको अवस्थामा उपमेयर राईले तोकेको काम कर्तव्य र अधिकारको काम गर्नुपर्नेमा सार्वजनिक पदको समेत दुरुपयोग गरी अपाङगता भएका व्यक्तिहरु उपर इङकित गर्दै सार्वजनिक कार्यक्रममा जानीजानी घृणा, हेला र तिरस्कार गर्ने गरी सार्वजनिक अभिव्यक्ति दिंदै हिडेको जाहेरीमा उल्लेख छ ।
उपमेयर राईले दिएको अभिव्यक्तिको भिडियो र अडियो जोहरीसँगै पेन ड्राइभमा पेश गरिएको र २०८१ बैशाख १३ गतेदेखि जेठ ६ गतेसम्म नगरपालिकाले संचालन गरेको ‘अपाङगता रोकथाम तथा पुनः स्थापना कार्यक्रम’मा सहभागी पाँच जनालाई बुझ्न जाहेरीमा भनिएको छ ।
आफूले बोलेको विषयलाई अडियोमा कटिङ गरेर गलत देखाउने कोशिष गरेकोप्रति ध्यानाकर्षण भएको र आपत्ति रहेको उपमेयर राईको भनाई रहेको छ ।
