जिल्लाका विभिन्न ११ ठाउँमा आयोजना गरेको बृहत् स्वास्थ्य शिविरमा ६ हजार ६३८ जना स्थानीय बासिन्दा लाभान्वित भएको आयोजकले जनाएको छ ।
खोटाङ घर भइ बेलायतमा बसोबास गर्दै आएका खोटाङ्गेहरुको संस्था ‘खोटाङ सेवा समाज बेलायत’ले यही चैत–१६ गतेदेखि २३ गतेसम्म जिल्लाका विभिन्न ठाउँमा विशेषज्ञ चिकित्सकसहितका स्वास्थ्यकर्मीको टोलीले हरेक ठाउँमा दुई÷दुई दिन निःशुल्क स्वास्थ्य सेवा उपलब्ध गराएका थिए ।
साकेला गाउँपालिकाको साकेला आधारभूत अस्पतालमा आयोजित शिविरमा ५११ जना, खोटेहाङ गाउँपालिकाको खोटाङबजार स्वास्थ्य चौकीमा आयोजित शिविरमा ७०३ जना, जन्तेढुङ्गा गाउँपालिकाको प्राथमिक स्वास्थ्य केन्द्र चिसापानीमा आयोजित शिविरमा ४८३ जना, रावाबेँसी गाउँपालिकाको हरमटारमा आयोजित शिविरमा ५६० जना र ऐसेलुखर्क गाउँपालिकाको ऐसेलुखर्क बजारमा आयोजित शिविरमा ६५८ जनाले निःशुल्क स्वास्थ्य सेवा लिएको आयोजक खोटाङ सेवा समाज बेलायतका महासचिव राजेन रामजङ राईले जानकारी दिनुभएको छ ।
हलेसी तुवाचुङ नगरपालिकाको दुर्छिममा आयोजना गरिएको शिविरमा ५३१ जना, बराहपोखरी गाउँपालिकाको धर्तुङमा आयोजना गरिएको शिविरमा ३७४ जना, दिप्रुङ चुइचुम्मा गाउँपालिकाको ओख्रेडाँडागाउँमा आयोजित शिविरमा ७९१ जना र दिक्तेल रुपाकोट मझुवागढी नगरपालिका–९ निर्मलीडाँडामा आयोजित शिविरमा ५०१ जनाले सेवा लिएका छन् ।
दिक्तेल रुपाकोट मझुवागढी नगरपालिकाकै वडा नं. १४ बुइपामा आयोजित शिविरमा ८४० जना र केपिलासगढी गाउँपालिकाको बाक्सिला बजारमा आयोजित शिविरमा ६८६ जनाले सेवा लिएका थिए ।
शिविरमा गाइनोलोजिस्ट, पेडियाट्रिक, जनरल फिजिसियन, दन्त रोग, हाडजोर्नी, ग्यास्ट्रोलोजी लगायत रोगको निःशुल्क उपचार र औषधि वितरण गरिएको आयोजक खोटाङ सेवा समाज बेलायतका अध्यक्ष डा. प्रमोद कोयी राईले जानकारी दिनुभएको छ ।
शिविरमा ४५ जना विशेषज्ञ चिकित्सकसहित १३० जना स्वास्थ्यकर्मी परिचालन गरिएको थियो । जिल्लाका ११ ठाउँमा आयोजना गरिएको शिविरमा करिब रु तीन करोड दश लाख बराबरको रकम खर्च भएको अध्यक्ष डा. प्रमोद कोयी राईको भनाई रहेको छ ।
श्वास्थ्यकै क्षेत्रमा यस भन्दा अगाडी पनि जिल्लाका विभिन्न ठाउँमा स्थायी घर भइ बेलायतमा बसोबास गर्दै आएका खोटाङ्गेहरुबाट चन्दा सङ्कलन गरेर खोटाङ सेवा समाज बेलायतले वि.सं. २०७३ चैत्र–२६ गते खोटाङलाई सातवटा एम्बुलेन्स निःशुल्क उपलब्ध गराएको थियो ।
