डिकेन्द्र बस्नेत,झापा। संसारकै मुक्तिदाता येशु खीष्टको जन्म दिन तथा ईसाईहरुको बडादिन खीष्टमसको अवसरमा दमक ईसाई समाजद्वारा “खीष्टमस शुभकामना कार्यक्रम ” गर्ने निर्णय भएको छ ।
यहीँ आउदो पुष ४ गते बुधबार कस्मिक पार्टी प्यालेस दमकमा बिहान ११ बजे शुभकामना कार्यक्रम हुने समाजले जनाएको छ।
दमक नगर ईसाई समाजले बर्षेनी संयुक्त रुपमा वृहत् खीष्टमस सुसमाचारीय कार्यक्रम गर्दै आईरहेको छ । तर यसपटक भने समय अलिक प्रतिकुल नभएको कारण सदा झै खुल्ला रुपमा बाहिर कार्यक्रम नगरी यसपटक भने पार्टी प्यालेस भित्र नै गर्ने भनि समाजको बैठकले पारित गरेको कार्यक्रम संयोजक पास्टर दावा शेर्पाले बताएका छन ।
खीष्टमस शुभकामना कार्यक्रमको मुख्य वक्तामा धनकुटाबाट पास्टर जीवन थापा मगर रहेका छन। प्रमुख अतिथिमा दमक नगर पालिकाका प्रमुख राम थापा, विशिष्ट अतिथिमा उपप्रमुख रेगिना भट्टराई, ईलाका प्रहरी कार्यलयका प्रहरी प्रमुख मनोज लामा त्यस्तै अतिथिहरुमा १० वटै वडाका वडा अध्यक्ष लगाएताका सामाजिक व्यक्तित्व, बुद्धिजीवी र समाजमा आवद्ध सम्पूर्ण मण्डली र संघ संस्थाहरुबाट व्यापक सहभागीता रहने ईसाई समाजका अध्यक्ष पास्टर आकाश थुलुङले बताए ।
उक्त दिन समाजद्वारा दमकका एक स्रष्टा जो नेपाली लोक संगितका सर्जक, गायक तथा समाजसेवी एल. पी. जोशीलाई अभिनन्दन तथा सम्मान गर्ने कार्यक्रम राखिएको समाजका सचिव पास्टर अजय पाठकले जानकारी दिएका छन ।
सो कार्यक्रममा सहभागीहरुले आ – आफ्नो जातीय भेषभुषामा सजिएर नेपाली मौलिकता झल्काउने बताइएको छ। कार्यक्रममा विभिन्न मण्डलीबाट गीत तथा नृत्य प्रस्तुत गरिने छ।
