सुनसरी । प्रदेश १ पुनः नामाङकन संयुक्त संघर्ष समितिले एमालेका अध्यक्ष केपि ओलि, महेश बस्नेत योगेश भट्टराई, प्रदेश सदस्य सहित आउने संकल्प यात्रालाई रोक्न झुलाघाट चिवा–भञ्ज्याङ् अनिश्चितकालका लागि बन्द गर्ने भएको छ ।
संघर्ष समितिले शनिबार धरानमा पत्रकार सम्मेलन गरेर कोशी नाम समर्थन गर्ने ८२ सांसद सहित ओलि र दुई नेतालाई प्रवेश निशेध गर्ने कुरा जनाएको छ ।
पहिचानको आधारमा पुनः नामकरण आम जनताको माग हो । यो कुरा पुनः दोहोर्याउदै मङ्सिर २६ गतेदेखि हुने मध्य पहाडी लोकमार्ग ‘घुर्मी–लेगुवा सडक अनिश्चितकालीन बन्द’ प्रभावकारी वनाउन थप सक्रिय बन्न आह्वान गर्दछौं पत्रकार सम्मेलनमा जारी बिज्ञप्तिमा उल्लेख छ ।
प्रदेश नं. १ पुनः नामाङ्कन संयुक्त सङ्घर्ष समिति ‘कोशी’ नाममा हस्ताक्षर गर्ने ८२ मध्येका प्रदेश सदस्य र राई, लिम्बू, शेर्पा, तामाङ, मगर, गुरुङ, नेवार, थारु, आदिवासी जनजातिलाई साम्प्रदायिक हिवासले अपराधी भन्ने र पहिचान पक्षधर खस÷आर्य, दलित, मधेशीहरूलाई आतङ्ककारी भनी बारम्बार गाली गर्दै आएका पूर्व प्रधानमन्त्री ओली, योगेश भट्टराई, महेश बस्नेत (तीन भाई) विरुद्ध कालो झण्डासहितको विरोध प्रदर्शन गर्दै आएका छौं– बिज्ञप्तिमा उल्लेख छ ।
तीन भाईले आत्माआलोचना गरेर ‘कोशी’ प्रदेश नाम पुनः नामकरण गर्ने प्रतिबद्धता गरेमा स्थिति हेरेर आन्दोलनको रूप परिवर्तन गर्न सकिने सबैमा प्रष्ट पार्न चाहन्छौँ भनिएको छ । तीन भाई वाहेकलाई हाम्रो कुनै अवरोध नहुने पनि विज्ञप्ति मार्फत जानकारी गराउँदछौ भनिएको छ ।
पहिचानको आन्दोलन एमाले, कांग्र्रेस, माओवादी केन्द्र विरुद्ध नभएको दावि छ । पहिचानको आधारमा पुनः नामकरण आम जनताको माग भएको दाबि छ । एमाले विरुद्ध मात्र गरिएको भन्ने सवालमा २०८० मङ्सिर १९ गते हामीले अनुरोध गर्दागर्दै मुख्यमन्त्री केदार कार्की, नेपाली कांग्रेस प्रदेश १ को संसदीय दलका नेता (पूर्व मुख्यमन्त्री) उद्धव थापा, प्रदेश सदस्य प्रदीपकुमार सुनुवार, रामकुमार खत्री (उदयपुर) ओखलढुङ्गा पुगेपछि कालो झण्डासहित विरोध प्रदर्शन गरिएको संघर्ष समितिका संयोजक डकेन्द्र सिंह थेगिमले बताए ।
तीन भाई आम जनताको माग सम्बोधन गरेर जनताको खुसी र सुखको पक्षमा लाग्नुको साटो पहिचानवादीहरूलाई अपराधी र आतङ्कारीको आरोप लगाउँदै सके उनीहरू बिच विभाजनको कुटिल प्रयास गर्ने, नसके साम्प्रदायिक द्वन्द्व गराउन उद्धत रहेको पहिचानवादीहरुको आरोप छ । प्रदेशको शान्ति, समृद्धि, समाजवाद र राष्ट्रिय एकताको लागि भइरहेको पहिचानको आन्दोलन एकपछि अर्को सशक्त वन्दै जाने समेत उनीहरुको दावि छ । एमाले, काङ्ग्रेस, माओवादी केन्द्र सम्बद्ध आदिवासी जनजाति नेता कार्यकर्ताहरूलाई प्रश्न गर्न चाहन्छौं भन्दै ‘कोशी’ र ‘कोसी’को भेद के हो ? कौशिक (‘कोशी’) मान्नु पर्ने किन ? पहिचानको आधारमा नाम राख्दा कसलाई के घाटा हुन्छ ? एमाले लगायतका पार्टीहरूलाई के घाटा हुन्छ ? लगायत दर्जनौं प्रश्न संघर्ष समितिमा आबद्ध घटक संस्थाका प्रमुखहरुले बताए ।
सम्मेलनमा किरात याक्थुङ चुम्लुङका अध्यक्ष प्रेम येक्तेनले लिम्बु समुदायले मुन्धुमी सिलामसाक्मा कम्युनिस्टको झण्डामुनि राखेको भन्दै आपत्ति जनाए । जसको दुरुपयोग गर्दै लिम्बु समुदायमा ब्लाक्मेलिङ गरेको आरोप लगाए । यो नसच्चिएमा थप आन्दोलन घोषणा गर्ने समेत उनले एमालेलाई चेतावनी दिएका छन् ।
पत्रकार सम्मेलनमा घटक दलका प्रमुख नेताहरुको समेत उपस्थिति रहेको थियो ।
