काठमाडौ । गत शुक्रबार सुनकोशी नदीमा जिप दुर्घटनामा परी मृत्यु भएका प्राविधिक शिक्षा तथा व्यावसायिक तालिम परिषद् (सीटीईभीटी)का दुई कर्मचारीको अन्त्येष्टि गरिएको छ । मंगलबार शव भेटिएका २ जना कर्मचारीको बुधबार अन्त्येष्टि गरिएको हो । उनीहरुको काठमाडौंस्थित पशुपति आर्यघाटमा अन्त्येष्टि गरिएको सिटीइभिटीले जनाएको छ ।
दुर्घटनामा सीटीईभीटीका प्रशासन निर्देशक भानु नगरपालिका ९ तनहुँका ५७ वर्षीय कृष्णबहादुर केसी, प्राविधिक अधिकृत फुयतया नगरपालिका ५ इलामका ३२ वर्षीय भानु पौडेलको आन अन्त्येष्टि गरिएको हो ।
नदीमा खसेका नीति योजना शाखाका महानिर्देशक प्रगति नगरपालिका ७ पूर्वी नवलपरासीका ५६ वर्षीय सहसचिव यमप्रसाद भुर्तेल अझै बेपत्ता छन् ।
सुनकोसी नदीको बहाव डाइभर्सन गरेर खोजी गरिएपछि गाडी र त्यसमा सवार दुई जनाको शव भेटिएको प्रहरीको भनाइ छ । नदीमा चार वटा स्काभेटर, तीनवटा जेसिवी, पाँच वटा ट्रक प्रयोग गरी डाइभर्सन गरेपछि मंगलबार नदीबाट गाडी र शव निकालिएको हो ।
काठमाडौंबाट खोटाङ तर्फ जाँदै गरेको सीटीईभीटीको बा १ झ ७४६७ नम्बरको स्कारपियो शुक्रबार मध्यान्ह मध्य पहाडी राजमार्गअन्तर्गत गोलञ्जोर गाउँपालिका–७ लौकुनबाट सुनकोसी नदीमा खसेको थियो ।
