खाेटाङ। उदयपुर र खाेटाङ जोड्ने फोक्सिङ्टारस्थित सुनकोशी नदिमा मोटरेबल पक्की पुल आज बिहिबारबाट सञ्चालन आएको छ ।
उक्त पुल सञ्चालनमा आएसँगै पुर्वि तराई आवतजावत गर्न र सामान ढुवानी गर्न खाेटाङ जिल्लाबासीहरुलाई केही सहज हुने भए पनि सडककाे दुर्दशा भने उस्तै रहँदा अझै पनि नागरिकहरु हर्षित भने छैन । तर,उक्त पुल सञ्चालनमा आएसँगै जिल्लाको आर्थिक क्रियाकलापदेखि विकास निर्माणमासमेत केहि सहजता हुने अपेक्षा चाहिँ गरिएको छ । दैनिक उपभोग्य सामान ढुवानीमासमेत केही सहजता हुनेभएपछि अघिल्लो वर्षहरु जस्तो बर्खामा सामानको मूल्य बृद्धि नहुने ब्यापारीहरुको अनुमान छ ।
२०७३ चैत २२ गते सम्पन्न गर्नेगरी २०६९ चैत २३ गते गौरी पार्वती वाईपी जेभीले पुल निर्माणको सम्झौता गरेको थियोे । गौरी पार्वती वाईपी जेभीको चरम ढिलासुस्तीका कारण सम्झौता भएको दश वर्ष पश्चात मात्र पुल सञ्चालनमा आएको छ । ठेकेदार कम्पनीको लापारबाहीको कारण हरेक वर्ष अस्थायी बेलिब्रिज जडान गर्दा र हटाउदा राज्य कोषबाट करोडौँको खर्च भैरहेको थियोे ।
१२० मिटर लामो पुल भ्याटसहित रु २२ करोड ६७ लाख ११ हजारमा पूरा गर्नेगरी निर्माण कम्पनीले ठेक्का लिएको थियो । पुलको रङरोगन तथा वाइरिङको काम बाकी रहेपनि बिहिबारबाट पुल सञ्चालनमा ल्याइएको छ ।
उता, कालोपत्रको काम थालिएको दिक्तेल–गाईघाट सडकखण्डको महुरे–फोक्सिङटार (४९ किलोमिटर) सडक अलपत्र अवस्थामा छ । जिल्लाको प्रमुख व्यापारिक केन्द्र दिक्तेल बजारबाट तराईका जिल्ला जोड्ने सबैभन्दा छोटो मार्गमा पर्ने उक्त महुरे–फोक्सिङटार सडक कालोपत्र ठेकेदार कम्पनीको चरम लापरबाहीले अलपत्र परेको छ ।
मध्यपाडी लोकमार्गबाट छुट्टिने महुरेदेखि राजापानीको सिम्पानी (२२ किलोमिटर) सडक कालोपत्रको काम भारत कन्ट्रक्सन/सिद्धी शाही जेभी तथा सिम्पानी भञ्ज्याङदेखि फोक्सिङटार (२७ किलोमिटर) सडक खण्डको काम देवनारायण पवन/मैनाचुली/खाम्पाचे जेभीले जिम्मा लिएको थियो । दुवै सडक ठेकेदारको लापरबाहीले कालोपत्रको काम नहुँदा हिउँदमा धुलो र वर्षामा हिलोका कारण यात्रुहरु समस्यामा पर्ने गरेका छन् । भने, सडक छेउका नागरिकहरु दाेहाेराे पिडामा छन्।न त मालपाेत कार्यालयले साे सडकले काटिएकाे जमिनकाे लगत कट्टा गर्याे न सडक पिचनै। गाडि गुडिरहेकाे जमिनकाे मालपाेत तिराईमा परेका छन् भने हिलाे धुलाेकाे पीडा उस्तै तसर्थ साे माेटरेवल पुल सञ्चालन हुँदैमा खुसि हुनुपर्ने नदेखिने बताउँछन् स्थानिय प्रेम कुमार श्रेष्ठ।
