नगरप्रमुख र अधिकृत विरुद्ध उजुरी

कृष्ण कुँवर (कर्नेलियस)
पर्बत । फलेवास नगरपालिकाका नगरप्रमुख गंगाधर तिवारी र प्रमुख प्रशासकीय अधिकृत नेत्र प्रसाद पौडेल बिरुद्ध गैरकानूनी कार्य गरेको भन्दै तेह्र जना कार्यपालिका सदस्यहरुले उजुरी दिएका छन् ।
जिल्ला समन्वय समितिको कार्यालयमा कात्तिक २४ गते उजुरी गर्दै प्रमुख जिल्ला अधिकारीलाई समेत जानकारी गराएका छन् । नगर प्रमुख तथा प्रमुख प्रशासकीय अधिकृतले स्थानीय स्रोतको दुरुपयोग गरेको, मनखुशी बजेट विनियोजन गरि खर्च भुक्तानी गर्ने गरेको आरोप लगाइएको छ ।
कार्यपालिका सदस्यहरुले संयुक्त विज्ञप्ति प्रकाशन गर्दै फलेवास नगर कार्यपालिकाको बैठकमा प्रस्ताब र छलफल नै नभएका बिषयहरु कार्यपालिकाको निर्णय पुस्तिकामा लेखिएको र स्थानीय स्रोत र बजेट दुरुपयोग गरेको जानकारी गराएका छन् ।
नगर कार्यपालिकाको बैठकमा छलफल नै नभएका बिषयहरु निर्णय पुस्तिकामा लेख्ने, स्थानीय स्रोतको दुरुपयोग गर्ने, मनखुशी रुपमा निर्णय लेख्ने, बजेट विनियोजन गर्ने, खर्च भुक्तानी गर्ने, गैरकानूनी कार्य गरेको र सो कार्यलाई नगरप्रमुख गंगाधर तिवारीले प्रोत्साहन गरेको, प्रमुख प्रसाशकीय अधिकृत नेत्र प्रसाद पौडेलले गैरकानूनी कार्य गरेको भन्दै कार्यपालिका सदस्यहरुले खेद प्रकट गरेका छन् ।
नगरप्रमुख तिवारी र प्रमुख प्रशासकीय अधिकृत पौडेललाई कार्यपालिका सदस्यहरुले भनेका छन्, ‘नगर कार्यपालिकाको २०७९ भाद्र १४ गते बसेको कार्यपालिकाको निर्णय बिपरित ५२ लाख ४९ हजार छ सय चौसठ्ठी रुपैया, २०७९ असोज १४ गते बसेको कार्यपालिकाको निर्णय विपरीत २० लाख ६० हजार तीन सय तेत्तिस गरि ७३ लाख ९ हजार ९ सय सन्तानब्बे रुपैयाको अनाधिकृत रुपमा निर्णय लेखी कार्यान्वयन गरेका छन् ।’
त्यसैगरी नगर कार्यपालिकाको २०७९ भदौ २५ गते बसेको कार्यपालिकाको बैठकको निर्णयमा सार्बजनिक खरिद नियमावली २०७७ आफूखुशि संशोधन गरेको, कार्यपालिकामा छलफल नै नगरी बिभिन्न बिषयगत समिति गठन गरेको आरोप लगाएका छन् ।
कार्यपालिका सदस्यहरुले भनेका छन्, ‘कार्यपालिकाका निर्णयहरु नगरपालिकाको वेबसाइटमा सार्बजनिक गरेको भन्दा बढि आफुखुशी निर्णय थप गरेको, नगरसभाको निर्णय भन्दा बाहिर गई बजेट कार्यान्वयन र योजना सम्झौता गरेका छन् ।’
फलेवास नगरपालिकाको नीति कार्यक्रम तथा बजेटको रेड बुक प्रकाशन नगरी बजेट खर्च गर्दै आएको भन्दै कार्यपालिकाका सदस्यहरु भन्छन्, ‘हामी फलेवास नगरपालिकाको बिकास, सम्बृद्वि, चाहेको छौं । बिधि–पद्दति अनुसार नगरपालिका संचालन गर्न र नगरबासीलाई गुणस्तरिय सेवा प्रदान गर्न प्रतिबद्द छौं ।’
विज्ञप्ती जारि गर्ने कार्यपालिका सदस्यहरुमा गंगानारायण श्रेष्ठ, नारायण लामिछाने, केशर पन्त, मनबहादुर कुँवर, रुद्रबहादुर पाठक, नेत्रबहादुर विक, बाुबराम सुनार, चन्द्रबहादुर नेपाली, दुर्गा कुमारी शर्मा, भगवती पौडेल, सावित्रा कुमारी शर्मा, सुनिता शर्मा र कला नेपाली रहेका छन् ।