काठमाडौं । राष्ट्रिय ख्रीष्टियन महासंघ नेपालप्रति आम जनमानसमा फैलाउन खोजिएको भ्रम हटेको छ । एक प्रेस विज्ञप्ती सार्वजनिक गर्दै महासंघले सामाजिक सञ्जालमा देखिएको सबै अन्यौल र भ्रमहरुको बारे सत्य तथ्य प्रमाण सहित आफ्नो आधिकारीक धारणा राखेको हो ।
आज सार्वजनिक गरिएको प्रेस विज्ञप्ती प्रमाणहरु सहित मुख्यगरी अध्यक्ष गहतराजको राजिनामा सम्बन्धमा महासंघले आफ्नो स्पष्ट प्रमाण पेस गरेको छ । विज्ञप्तीका अनुसार “राष्ट्रिय ख्रीष्टियन महासंघ नेपालको १४ औँ चितवन राष्ट्रिय भेलाले गरेको निर्णय अनुसार अध्यक्ष सी.बी. गहतराज महासंघको दर्शन पुरा गर्न राजनीतिक यात्रा तय गर्नुपर्ने भएकोले आपसी समझदारीमा राजीनामा दिनुभएको र मिति २०७९ जेठ १५ गते तत्कालिन कार्यवाहक अध्यक्ष फिलेमोन खड्का क्षेत्रीको अध्यक्षतामा विषयमा बसेको विशेष केन्द्रीय समितिको बैठकको निर्णय अनुसार महासंघको अर्काे राष्ट्रिय भेला नभए सम्मका लागि सबै अख्तियारी अध्यक्ष सी.बी. गहतराजलाई नै दिने गरी उहाँको राजीनामा फिर्ता गर्ने सर्बसम्मतले निर्णय गरिएको थियो । जस अनुसार विधान संवत सी.बी. गहतराज नै राष्ट्रिय ख्रीष्टियन महासंघ नेपालको अध्यक्ष रहेको प्रस्ट छ ।” विज्ञप्तीमा लेखिएको छ ।
त्यस्तै, तत्कालिन कार्यवाहक अध्यक्ष फिलेमोन खड्का क्षेत्रीका विषयमा पनि विज्ञप्तीमा यस्तो लेखिएको छ “यसबिच रेभ. डा. फिलेमोन खड्का क्षेत्रीले गैरजिम्मेवारी पुर्वक महासंघको विधान र निर्णय विपरित कार्य गर्नुभएकोले उहालाई दिइएको कार्यवाहक अध्यक्षको जिम्मेवारी फिर्ता लिई सम्पुर्ण कार्यकारी भुमिका निर्वाह गर्नेगरी महासंघको विधानको धारा २३, उपधारा (ख) को १ बमोजिम सहअध्यक्ष डोमा राई ज्यूलाई मिति २०७९ असोज २९ गते कार्यवाहक अध्यक्षको जिम्मेवारी दिइएको जानकारी गराउँदछौँ ।”
भारतको दिल्लीमा हालै सम्पन्न पास्टर तथा अगुवा भेलामा स्वयम् रेभ डा. फिलेमोन खड्का क्षेत्रीले अध्यक्षता गरेकाे र महासंघको आधिकारीकता नभएको कार्यक्रममा महासंघको विषय प्रवेश गराई विधान र निर्णय विपरित कार्य गरेकोले तत्कालीन कार्यवाहक अध्यक्ष फिलेमोन खड्का क्षेत्रीलाई दिईएको जिम्मेवारी फिर्ता लिईएको हो । साथै क्षेत्रिलाई यी सबै विषयको १५ दिने स्पष्ट धारणा मागिएको पनि विज्ञप्तीमा उल्लेख गरिएको छ ।
यसैसँगै, राष्ट्रिय ख्रीष्टियन महासंघ नेपालको आउदो राष्ट्रिय अधिवेशन नभएसम्मका लागि कार्यवाहक अध्यक्षको जिम्मेवारी सहअध्यक्ष डोमा राईलाई दिइएको विज्ञप्तीमा उल्लेख गरिएको छ । पछिल्लो समय महासंघको गरिमालाई खलबलाउने गरी सामाजिक सञ्जालमा अनेकौ टिका टिप्पणी हुँदै आएको बेला अध्यक्ष गहतराजले सबै प्रमाण सहित प्रस्तुत भई भ्रमको पछि नलाग्न आग्रह गरेका छन् ।
