काठमाडौैं । पशुपतिनाथ मन्दिर क्षेत्रबाट रोशनी शाही पक्राउ परेकी छन् । पशुपतिनाथ क्षेत्रमा महायज्ञमा सहभागी बलात्कार आरोप लागेका सिद्धबाबाविरुद्ध मंगलबार नाराबाजी गरेकी रोशनीलाई प्रहरीले पक्राउ गरेको हो ।
सिद्धबाबा भनिने कृष्ण गिरी बलात्कार आरोपी रहेको भन्दै होहल्ला गरेपछि रोशनीलाई पक्राउ गरिएको प्रहरीले जनाएको छ ।
आफ्नै अनुयायीलाई बलात्कार आरोप लागेर हाल अदालतमा मुद्दा प्रक्रियामा रहेका सिद्धबाबालाई रोशनीले ‘बलात्कारी’ भन्दै विरोध जनाएकी थिइन् ।
रोशनीलाई महानगरीय प्रहरी बृत्त गौशालामा राखिएको थियो । तर, अहिले रोशनीलाई उनका आफन्तले बुझेर लगेका छन् ।
पशुपति परिसरमा सिद्धबाबा आध्यात्मिक प्रतिष्ठानको नाममा ‘अतिरुद्र महायज्ञ’चलिरहेको छ । महायज्ञका प्रमुख वाचक गिरीविरुद्ध अहिले जिल्ला अदालत सुनसरीमा चलिरहेको मुद्दा विचाराधीन छ ।
गिरीविरुद्ध अनुयायीले बलात्कार अभियोग लगाएपछि जिल्ला अदालत सुनसरीमा मुद्दा चलाइएको थियो । तर, गिरीलाई सुनसरी अदालतले सफाइ दिएको थियो ।
त्यसलाई लिएर जिल्ला सरकारी वकिलको कार्यालयले उच्च अदालत विराटनगरमा अपील दर्ता गराएको थियो । उच्च अदालतले फेरि मिसिल अध्ययन गरेर आवश्यक निर्णय लिन जिल्ला अदालत सुनसरीका नाममा आदेश दिएको थियो ।
