काठमाडौं । काठमाडौंको नेपालटारस्थित डेरामा मृतावस्थामा भेटिएकी लोकदोहोरी गायिका दिलमाया सुनार प्रकरणको अनुसन्धान जारी छ । प्रहरीले हत्या आरोपमा उनका प्रेमीलाई पक्राउ गरेको छ ।
हत्या भएको प्रारम्भिक निष्कर्ष निकालेको प्रहरीले सूर्य श्रेष्ठलाई पक्राउ गरेको छ । उनीविरुद्ध अदालतबाट दुईपटक म्याद थप गरिएको छ । यही असार ११ गते शनिबार बिहान पौने ११ बजे दिलमाया कोठामै मृतावस्थामा फेलापरेकी थिइन् । उनको घाँटीमा निलडाम देखिएको थियो ।
उनको स्थायी घर सुर्खेत हो । असार १० गते शुक्रबार राति ‘काठमाडौंमा आफूलाई बाँच्न गाह्रो भएको’ भन्दै उनको फेसबुकमा ‘सुसाइड नोट’ आशयको स्टाटस पोस्ट गरिएको थियो । शुक्रबार राति १ बजेर २० मिनेटमा उनको फेसबुकमा स्टाटस लेखिएको थियो ।
प्रहरीका अनुसार असार ११ गते बिहान ३ बजे आसपासको समयसम्म दिलमायाले प्रयोग गर्ने मोबाइल कोठामै देखिएको थियो । त्यसपछि, मोबाइलको ‘लोकेसन’ देखिएको छैन । पतिसँग सम्बन्धविच्छेद भएपछि दिलमाया सूर्यसँगै ‘लिभिङ टुगेदर’मा बस्दै आएकी थिइन् । उक्त शुक्रबार राति पनि सूर्य दिलमायाको कोठामै रहेको खुलेको थियो ।
प्रहरीले सूर्यले नै हत्या गरेको दाबी गर्दै आएको छ । मोबाइल पनि सूर्यले नै लुकाएको हुन सक्ने प्रहरी आशंका छ । प्रहरीका अनुसार उनले मोबाइलका बारेमा अनविज्ञता प्रकट गर्दै आएका छन् । पक्राउ परेका सूर्यले भने आफूले हत्या नगरेको दाबी गर्दै आएको बताइएको छ । तर, घटनामा उनको संलग्नता पुष्टि हुने आधार फेलापरेको प्रहरी दाबी छ ।
सञ्चारमाध्यममा दिलमायाको पोस्टमार्टम रिपोर्टबारे खबर सार्वजनिक भए पनि प्रहरी वृत्त बालाजुका डीएसपी गौतम मिश्र भने रिपोर्ट नआएको बताउँछन् । पक्राउ परेका सूर्य विवाहित हुन् । प्रहरीले दिलमायाको ‘हत्या’को कारण खोज्दै छ ।
डीएसपी मिश्र भन्छन्, “अनुसन्धानका सबै कुरा भन्न मिल्दैन । अभियुक्तले सबै कुरा नस्वीकारे पनि उनको उपस्थितिलगायत कुराहरू छन् । अनुसन्धानमा अझै केही समय लाग्छ ।”
प्रहरीले सुरुआती समयमा दिलमायाले आत्महत्या गरेको हुन सक्ने आशंका गरेको थियो । तर, घरधनीले शुक्रबार राति घरमा एक पुरुष आएको देखेको सूचना दिएपछि प्रहरी अनुसन्धान अगाडि बढेको थियो । सुरुमा सूर्यले दिलमायाको घटनाबारे अनविज्ञता प्रकट गरेता पनि उनको मोबाइलको लोकेसन र मोटरसाइकल कोठाअगाडि सीसी क्यामेरामा देखिएपछि उनले शुक्रबार राति दिलमायासँगै रहेको स्वीकार गरेका थिए । सूर्यले घटनाको राति आफूले घरेलु मदिरा र मासु खाएको बताएका थिए । दिलमायाले भने ‘स्प्राइट’ पिएको उनैले बताएका थिए ।
