खोटाङ । दश वटा स्थानिय निकाय रहेकाे खाेटाङका दुइ नगरपालिका र आठ पालिकाहरुमा स्थानीय तहको निर्वाचन पूर्णरुपमा सम्पन्न भएपछि अब जिल्ला समन्वय समिति खोटाङको निर्वाचन हुने भएको छ ।
जिल्ला निर्वाचन कार्यालय दिक्तेलमा शुक्रबार सबैदलको प्रतिनिधिहरुसँग निर्वाचन कार्यालयले राखेको छलफलबाट जिल्ला समन्वय समितिको निर्वाचन मिति तोक्ने सहमति भएको हो ।
जिल्ला निर्वाचन कार्यालयले जेष्ठ २३ गते अन्तिम मतदाता नामावली प्रकाशन गर्ने भएको छ । भने २४, २५ र २६ गते स्थानीय तहका जनप्रतिनिधिहरुको प्रदेश नं. १ विराटनगरमा गोष्ठी सञ्चालन हुने भएकोले जेष्ठ २८ गते उम्मेदवारी मनोनयनको मिति तय गरिएको जिल्ला निर्वाचन कार्यालय स्रोतले जनाएको छ ।आगामि जेष्ठ ३० गते मतदान सम्पन्न हुने हिजाेको छलफलकेै सहमति बमोजिम निर्वाचन कार्यालयले सूचना जारी गर्ने जनाइएको छ ।
जिल्ला समन्वय समितिमा प्रमुख र उपप्रमुख सबैभन्दा बढी मत प्राप्त गर्ने एक/एक जना , महिला सदस्य पदमा सबैभन्दा वढी मत प्राप्त गर्ने तीनजना महिला सदस्यहरु, दलित वा अल्पसंख्यक समुदायबाट हुने सदस्य पदमा सबैभन्दा वढी मत प्राप्त गर्ने एक जना र अन्य सदस्य पदमा जिल्ला सभाले निर्धारण गरेको संख्या बमोजिम सबैभन्दा वढी मत प्राप्त गर्ने वढीमा तीनजना सदस्यहरु रहने व्यवस्था रहेकाेछ ।
