खोटाङ । दिक्तेल रुपाकोटमझुवागढी नगरपालिका खोटाङको नगर कार्यपालिकाले पूर्णता पाएको छ । कार्यपालिका निवार्चनबाट नगरपालिकाको कार्यपालिका सदस्यहरु चयन भएसंगै दिक्तेलरुपाकोट मझुवागढी नगरपालिकाको नगर कार्यपालिकाले पूर्णता पाएको हो ।
नगरपालिकाको प्रमुख नेपाली कांग्रेस र उपप्रमुख नेकपा माओवादी केन्द्रले जितेको नगर कार्यपालिकामा गठबन्धनको बहुमत रहेको छ । २५ जनाको नगर कार्यपालिका भएको यस नगरपालिकामा १७ जना पहिल्यै चुनिएर आइसकेका छन । १५ वडाका वडा अध्यक्ष, प्रमुख, उपप्रमुख सहित आज ८ जना निर्वाचित भएसंगै नगरकार्यपालिका पुर्ण भएको छ ।
चुनिएका कार्यपालिका सदस्य हरुमा नेपाली कांग्रेसका मिना कार्की, मनिला राई र अन्जना केसि बस्नेत, नेकपा माओवादी केन्द्रका राम कुमार हिङमाङ, गंगा बिक र धनशोभा राई, नेकपा एस पार्टीका झुलेन्द्र बिस्वकर्मा रहेका छन । यस्तै जनता समाजवादी पार्टीका तर्फबाट विरेन्द्र कुमार दर्नाल कार्यपालिका सदस्यमा निर्वाचित भएका छन् ।
गत बैशाख ३० गते सम्पन्न स्थानीय तह निर्वाचनमा यस नगरपालिकामा नेकपा माओवादी केन्द्र बहुमतमा रहेको छ । नेकपा माओवादी केन्द्रले पालिकाका ६ वटा वडामा वडाध्यक्ष जित हात पारेको छ । दोश्रो स्थानमा नेपाली कांग्रेस रहेको छ । नेपाली कांग्रेसले यस नगरपालिकाका ४ वटा वडामा वडाध्यक्ष जितेको छ । एमाले यो स्थानीय निर्वाचन बाट जिल्ला भरि तेश्रो बनेको छ भने यस नगरपालिकामा एमाले अल्पमतमा छ । एमालेले नगरपालिकाका ३ वटा वडा जितेको छ भने जनता समाजवादी पार्टी ले २ स्थानमा जित हात पारेको छ ।
