खोटाङ । खोटाङमा सडक कालोपत्रेको काममा खटिएका श्रमिकले पारिश्रमिक नपाएको भन्दै निर्माण कम्पनीको एस्काभेटर, ग्रेडर, लोडर लगायतका उपकरण अन्यत्र लैजान रोक लगाएको छ ।
दिक्तेल–गाईघाट सडक खण्ड अन्तरगत राजापानी (सिमपानी)–फोक्सिङटार सडक कालोपत्रेको काममा श्रम गरिरहेका श्रमिकले लामो समयदेखि पारिश्रमिक नपाएको बिरोधमा निर्माण कम्पनी देवनारायण पवन/मैनाचुली/खाम्पाचे जेभीको एस्काभेटर, ग्रेडर, लोडर लगायतका उपकरण अन्यत्र लैजान रोक लगाएको हो ।
निर्माण कम्पनीले निर्माणस्थलबाट एस्काभेटर, ग्रेडर, लोडर लगायतका उपकरण अन्यत्र लैजान खोज्दा सडक कालोपत्रेका क्रममा पसिना बगाइरहेका श्रमिक, उधारो सामान दिएका व्यवसायी र घर भाडा दिएका स्थानीयले अवरोध गरेका छन् ।
सडक कालोपत्रेका काममा श्रम गरिरहेका श्रमिक, व्यवसायी र स्थानीयले जिल्ला प्रशासन कार्यालयलाई निबेदनमार्फत श्रमिकको पारिश्रमिक, घरभाडा, गाडीभाडा र खाद्यान्नको भुक्तानी चुक्ता नगरेसम्म निर्माण स्थलमा भएका निर्माण सामग्री अन्यत्र लैजान नदिने जानकारी गराएका छन् ।
निवेदकका अनुसार निर्माण कम्पनीबाट २०७६ सालदेखि विभिन्न स्थानमा घरभाडा, ज्यामीको पारिश्रमिक, गाडीभाडा र खाद्यान्नको गरी करिब १ करोड ५८ लाख २१ हजार ५९४ रकम भुक्तानी गर्न बाँकी छ । उनीहरुले श्रमिकको पारिश्रमिक, घरभाडा, गाडीभाडा र खाद्यान्नको भुक्तानी चुक्ता नगरेसम्म निर्माणस्थलमा भएका सामग्री अन्यत्र लैजान नदिने निवेदन गरेका हुन् ।
५५ करोड ८७ लाखमा १० साउन २०७७ भित्र कालोपत्रे पूरा गर्ने शर्तमा देवनारायण पवन/मैनाचुली/खाम्पाचे जेभीले ११ साउन २०७३ मा राजापानी (सिमपानी)–फोक्सिङटार (२७ किलोमिटर) खण्डको सम्झौता गरेको थियो । तर सो खण्डको हालसम्म करिब ६० प्रतिशत मात्र प्रगती भएको छ ।
महुरे–फोक्सिङटार सडक खण्ड अन्तरगत महुरेदेखि राजापानीको सिमपानी (२२ किलोमिटर) सडक कालोपत्रेको काम भने भारत कन्ट्रक्सन/सिद्धी शाही जेभी गरिरहेको छ । सो खण्डको काममा पनि चरम ढिलासुस्ती भइरहेको छ भने पन्चर्दाेबाटाे देखि माला सम्मकाे सडकमा विभिन्न ठाउँकाे बाटाे छेउकाे माटाेकाे थुप्राे नहटाइँदा बर्षामा पानी जम्ने र हिउँदमा भुसभुसे धुलाेकाे कारण साना सवारीसाधन चल्न नसक्ने अवस्था छ भने ठुला सवारीसाधन त्यसमै फसेर रहँने अवस्था छ।
उक्त गाइघाट- दिक्तेल सडक खण्डले साे सडक विस्तारित जमिनकाे न त मुआब्जा दिएकाे छ न त मालपाेत कार्यालयले लगत कट्टानै गरिदिएकाे छ। आफ्नाे खेतियाेग्य जमिनबाट सार्वजनिक सवारीसाधनहरु दाैडिरहेकाे जमिनकाे समेत मालपाेतमा तिराे तिरेनु परेकाे र त्यसकाे उपलब्धि भने सवारीसाधनले बर्षायाममा हिलाे छ्याप्ने र हिउँदमा धुलाम्य हुने गुनासाे स्थानियहरुकाे छ।
