धरान । सुनसरीको धरान उपमहानगरपालिकामा १०२ जनप्रतिनिधि निर्वाचित भएका छन् । वैशाख ३० गते सम्पन्न स्थानीय तह निर्वाचनबाट धरानवासीले आगामी पाँच वर्षका लागि १०२ जना जनप्रतिनिधि छानेका हुन् । मेयरमा स्वतन्त्र उम्मेदवार हर्कराज राई (साम्पाङ) २० हजार ८२१ मत ल्याए निर्वाचित हुँदा उपमेयरमा माओवादी केन्द्रका अइन्द्र विक्रम बेघा विजयी भएका हुन् ।
गएको पाँच वर्ष धरानको नेतृत्व एमाले र काँग्रेसको हातमा थियो । ०७४ को निर्वाचनमा मेयर–उपमेयर र बहुमत वडा एमालेको कब्जामा थिए । तत्कालीन मेयर तारा सुब्बाको निधनपछि ०७६ मा भएको उपनिर्वाचनबाट धरानको नेतृत्व काँग्रेसको हातमा पुग्यो । उपनिर्वाचनमा काँग्रेसका तिलक राई २६ हजार ७०९ मत ल्याएर निर्वाचित भएका थिए ।
