काठमाडौं । सुनसरीको धरान उपमहानगरपालिका मेयरमा निर्वाचित हर्कराज राई साम्पाङले पदभार ग्रहण गरेका छन् । मंगलबार उपमहानगरको कार्यालयमा पुगेर उनले पदभार ग्रहण गरेका हुन् ।
उनले स्थानीय कर प्रणालीलाई वैज्ञानिक एवं व्यवस्थित तुल्याउन राजश्व सम्बन्धी कार्यदल गठन गर्ने पहिलो निर्णयमा हस्ताक्षर गरेका छन् ।
वरिष्ठ राजश्व तथा सूचना अधिकृत खगेन्द्रप्रसाद खतिवडाले पेश गरेको राजश्व अध्ययन कार्यदल गठनसम्बन्धी प्रस्ताव प्रमुख राईले सदर गरेका हुन् । उनको निर्णय अनुसार उपप्रमुखको संयोजकत्वमा कार्यदल गठन भएको छ ।
कार्यकालको सदस्यहरूमा प्रमुख प्रशासकीय अधिकृत, नगर प्रमुखबाट मनोनित अर्थशास्त्री एकजना, सुनसरी उद्योग वाणिज्य संघको अध्यक्ष वा निजले तोकेका प्रतिनिधि र राजश्व महाशाखा प्रमुख सदस्य सचिव रहनेछन् ।
प्रमुख राईले सोमबारै जिल्ला अदालत सुनसरीका १ नम्बर न्यायाधीश कैलाश सुवेदीबाट सपथ ग्रहण गरेका थिए । उनले सोमबार नै उपप्रमुख आइन्द्रविक्रम बेघासहित १०१ जना जनप्रतिनिधिलाई सपथ खुवाएका थिए ।
