असिम कामु मगर
भैरहवा । भैरहवास्थित गौतमबुद्ध अन्तर्राष्ट्रिय विमानस्थलमा राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) को ए-३३० वाइडबडी जहाजले सफल अवतरण गरेको छ ।
हिजाे दिउँसो ३ बजे उड्ने भनेको वाइडबडी दुई घण्टा ढिलाेभई साँझ ५:०० बजे त्रिभुवन अन्तर्राष्ट्रिय विमानस्थलबाट उडेको जहाज ५:५५ बजे ल्याण्ड भएको हो । यसअघि जहाज रनवेबाट फर्किन सकेको थिएन । तर केही समयमै फर्काइएको थियो । विमानस्थल पुगेपछि जहाजलाई पानीको फोहोराले स्वागत गरिएको थियो ।
जहाज संस्कृति पर्यटन तथा नागरिक उड्डयनमन्त्री प्रेम आले, सचिव, कर्मचारी तथा पत्रकारलगायत पूरा क्षमतामा यात्रु बोकेर उडेको हो । जहाजको सिट क्षमता दुई सय ७४ रहेकाे छ । जहाजमा आएका संस्कृति पर्यटन तथा नागरिक उड्डयनमन्त्री प्रेम आले, सचिव लगायतलाई स्वागत गरिएको छ । उनीहरूलाई खादा, माला लगाएर विमानस्थल प्रशासनले स्वागत गरेको हो ।
जहाजले ‘अप्रेसनल पर्फमेन्स टेस्ट फ्लाइट’ परीक्षण उडान गरेको हो । नेपालको उड्डयन इतिहासमा दोस्रो अन्तर्राष्ट्रिय विमानस्थलमा यो पहिलोपटक ठूलो जहाजले उडान भरेको हो ।
