काठमाडौं । सत्तारुढ गठबन्धनले स्थानीय तह निर्वाचनका लागि तालमेलका ७ आधार तय गरेको छ । मंगलबार साँझ प्रधानमन्त्रीको सरकारी निवास बालुवाटारमा बसेको बैठकले तालमेको आधार तय गरेको हो ।
गठबन्धनले सिट बाँडफाँटका लागि २०७४ मा सम्पन्न स्थानीय तह निर्वाचनमा दलका उम्मेदवारले प्राप्त गरेको मतलाई प्रमुख आधार बनाएको छ । गठबन्धनले तय गरेको मोडालिटीअनुसार अघिल्लो निर्वाचनमा धेरै मत पाएका पार्टीले नै अबको निर्वाचनमा समेत प्रमुख पाउने भएका छन् ।
गठबन्धनले अघिल्लो निर्वाचनको मतभारलाई आधार मान्ने निर्णय गरेतापनि वर्तमान समयमा गठबन्धनका दलहरुको संगठनात्मक अवस्था र जनसमर्थनलाई पनि महत्वका साथ ध्यान दिने निर्णय गरेको छ । जसअनुसार अघिल्लो निर्वाचनमा कम मत पाएपनि यस अवधिमा संगठन राम्रो बनाएका पार्टीले पनि सिटका लागि दावी गर्न पाउने भएका छन् ।
गठबन्धनले तय गरेको आधारअनुसार अघिल्लो निर्वाचनमा नेकपा एमालेले जितेका स्थानीय तहमा नेकपा एकीकृत समाजवादीले प्रमुख पाउने भएको छन् ।
गठबन्धन बैठकले गठबन्धनमा आवद्ध हुन चाहने अन्य दलहरुका लागि समेत लातमेलको बाटो खोलेको छ । मोडालिटीको ४ नम्बरमा ‘२०७४ को स्थानीय तहको निर्वाचनमा विजयी प्राप्त गरेको नभएता पनि स्थानीय तहमा उपस्थिति रही यथासक्य गठबन्धनभित्र अन्य दललाई पनि सहभागी गराउने’ उल्लेख छ ।
तालमेलको मोडालिटी तय गरेको गठबन्धनले गठबन्धनभित्रबाट हुनसक्ने अन्तरघातलाई ध्यानमा राखेर अन्य दलसँग तालमेल गर्न नपाउने समेत निर्णय गरेको छ ।
गठबन्धनले तय गरेको सिट बाँडफाँटको ७ आधार-
१) २०७४ को स्थानीय तह निर्वाचनमा प्रमुख पदमा विजयी नेकपा एकीकृत समाजवादी कायम रहेको जनप्रतिनिधिहरुलाई यसैअनुसार मान्ने ।
२) २०७४ को निर्वाचनमा दलका उम्मेदवारहरुले पालिका, वडामा प्राप्त गरेको मतको मतभार ।
३) २०७४ को स्थानीय तहको निर्वाचनमा विजयी प्राप्त गरेको नभएता पनि स्थानीय तहमा उपस्थिति रही यथासक्य गठबन्धनभित्र अन्य दललाई पनि सहभागी गराउने ।
४) २०७४ को निर्वाचनमा गठबन्धन बाहेकका दल विजयी स्थानमा गठबन्धन भित्रका दलहरुले उक्त निर्वाचनमा प्रमुख पदमा प्राप्त मतलाई आधार बनाउने । यसको साथै उक्त तहमा दलका उम्मेदवारहरुले प्राप्त गरेको मतभारलाई आधार बनाउने ।
५) नेकपा एकीकृत समाजवादी २०७४ को निर्वाचनमा उक्त पार्टीको रुपमा सहभागी नभएको हुँदा माथि बुँदानम्बर ४ मा उल्लेखित आधारहरुले मात्र नहुने र उक्त पार्टी नेकपा एमाले विभाजित भए बनेको मुख्य शक्ति रहेको यथार्थलाई मनन् गर्ने ।
६) गठबन्धनमा रहेका दलहरुबीच सिट बाँडफाँट गर्दा माथि उल्लेखित आधारहरुका अतिरित्त वर्तमान समयमा गठबन्धनका दलहरुको संगठनात्मक अवस्था र जनसमर्थनलाई पनि महत्वका साथ ध्यान दिने ।
७) गठबन्धनभित्र रहेका दलहरुबीच मात्र चुनावी तालमेल गर्न पाउने । Dristinews.com
