खोटाङ । खोटाङको ऐसेलुखर्क गाउँपालिकाका अध्यक्ष र उपाध्यक्षले सरकारी गाडी फिर्ता गरेका छन् । गाउँपालिकाको सभाहल उद्घाटन एवं विशेष गाउँसभाको अवसरमा शुक्रबार गाउँपालिका अध्यक्ष बिश्वनाथ निरौला र उपाध्यक्ष पुष्पकला भुजेलले आफुले प्रयोग गर्दैआएको गाडी फिर्ता गरेका हुन् ।
गाउँपालिका अध्यक्ष निरौलाले आफुले चढ्दैआएको बा २ झ ३४९६ नम्बरको स्कार्पियो गाडी र उपाध्यक्ष भुजेलले आफुले प्रयोग गर्दैआएको बा २ झ ४३९४ नम्बरको गाडीको चाँबी गाउँपालिकाकी प्रमुख प्रशासकीय अधिकृत हिराकुमारी यादवलाई हस्तान्तरण गरेका छन् ।
गाडीको चाँबी हस्तान्तरण गर्नुहुदै पालिका उपाध्यक्ष पुष्पकला भुजेल ।
गाउँपालिका अध्यक्ष निरौला र उपाध्यक्ष भुजेलले निर्वाचन आचार संहिता लागू हुन लाग्दा गाडी फिर्ता गरेका हुन् । ऐसेलुखर्क गाउँपालिकामा अध्यक्षको प्रयोजनकालागि २०७४ सालमा र उपाध्यक्षको प्रयोजनकालागि २०७५ सालमा गाडी खरिद गरिएको थियो । जनताको नासोको रुपमा प्रयोग गर्दैआएको गाडी फिर्ता गरिएको गाउँपालिका अध्यक्ष निरौलाले बताए ।
यस्तेै, गाउँपालिकाले डेढ सय जना क्षमताको सभाहल निर्माण गरेको छ । ४७ लाख ७६ हजार ८०८ रुपैयाँमा समिक्षा निर्माण सेवा, सुनसरीले निर्माण गरेको सभाहल शुक्रबार उद्घाटन गरिएको हो ।
सभाहलमा ५० जना अट्ने स्टेज, करिब सय जना अट्ने ८ स्टेपको प्याराफिट, दुई वटा स्टोर रुम, तीन वटा धारा लगायतका संरचना बनाइएको छ । सभाहल उद्घाटन लगत्तै विशेषसभा सञ्चालन गरिएको थियो ।
