दमौली । कृषि ज्ञान केन्द्र तनहुँले व्यास –९ गजौडेका कृषकलाई अनुदानमा हाते ट्र्याक्टर वितरण गरेको छ । सुनौला नयाँ गोरेटो कृषि सहकारी संस्थामा आबद्ध कृषकलाई ज्ञान केन्द्रले हाते ट्र्याक्टर वितरण गरेको हो ।
पचास प्रतिशत अनुदानमा नौवटा हाते ट्र्याक्टर वितरण गरिएको ज्ञान केन्द्रका प्रमुख कुलप्रसाद तिवारीले जानकारी दिए । कृषिमा यान्त्रिकीरण गर्ने उद्देश्यसहित हाते ट्र्याक्टर वितरण गरिएको तिवारीले बताए । हाते ट्र्याक्टरको कूल लागतको पचास प्रतिशत कृषकले र पचास प्रतिशत कार्यालयले व्यहोरेको छ ।
“लागत घटाउँदै कृषिमा यान्त्रिकीरण गर्नका लागि कृषकलाई उपकरण दिएका हौँ”, उनले भने, “परम्परागत प्रविधिको खेतीले आम्दानीभन्दा खर्च धेरै भइरहेको छ । कृषिमा यान्त्रिकीरण गर्न सके लागत घट्न गई आम्दानी बढाउन सकिन्छ ।” जिल्लाकै ऋषिङ गाउँपालिकाले कृषकलाई पचास प्रतिशत अनुदानमा कृषि उपकरण वितरण गरेको छ । गाउँपालिकाले वडा नं ४ भिरकोटका कृषकलाई अनुदानमा हाते ट्र्याक्टर वितरण गरेको हो ।
परम्परागतरूपमा कृषि पेशा गर्दै आएकालाई व्यावसायिक बनाउन १० कृषकलाई हाते ट्र्याक्टर उपलब्ध गराइएको प्रवक्ता विजय दरैले जानकारी दिए । हाते ट्र्याक्टर पाएपछि यहाँका कृषक खुसी भएका छन् । खेतबारी जोत्नका लागि गोरुको प्रयोग गर्दा लागत महँगो हुने गरेकाले हाते ट्र्याक्टरले लागत पनि कम गराउने बताइएको छ । गाउँका युवा विदेशिएकाले कृषि क्षेत्रमा काम गर्ने मजदुरको अभाव खेपिरहेका किसानलाई ट्र्याक्टर पाएपछि सहज हुने विश्वास गरिएको छ ।
गाउँपालिकाका अध्यक्ष राजेन्द्रकृष्ण श्रेष्ठले भने, “हाम्रो मुलुकमा विकसित प्रविधि किसानको पहुँचमा पुर्याउन नसक्दा निर्वाहमुखी उत्पादनमा अल्झिएका छौँ ।” ऋषिङका अधिकांश भू–भाग भिरालो भएकाले साना र हलुँगा किसिमका हाते ट्र्याक्टर किसानलाई उपयुक्त हुने बताइएको छ ।
