दार्चुला । जिल्लाको दुहुँ गाउँपालिकाका अध्यक्ष हुन् पुलेन्द्र कार्की । नेपाली कांग्रेस दार्चुलाका सचिवसमेत रहेका कार्कीकी २७ बर्षीया छोरी साबित्री हिकिलास्थित स्वास्थ्य केन्द्रमा अनमीको पदमा कार्यरत छिन् ।
उनले परिवार पहिचान सर्वेक्षणमा आधारित गरिब घर परिवारको सूची संकलन गर्दा आफूलाई ‘सामान्य गरिब’मा राख्न लगाएकी छन् । उनका श्रीमान पनि सशस्त्र प्रहरीका हवल्दार हुन् । कार्की दम्पत्ती जागिरे भएकाले घरको आर्थिक अवस्था सबल छ । तर, उनीहरुले आफ्नो नाम गरिबको सूचीमा दर्ता गराएको पाइएको हो ।
जागिर खाइरहेका र सेवा निबृत्त भएका हिकिलाका अन्य केही व्यक्तिले पनि गरिबको सूचीमा पर्दा पालिकाबाट सेवा, सुबिधा लिन सजिलो होस भनेर त्यसो गरेको एक स्थानीयले बताए । ‘आर्थिक रुपमा गरिब नभएपनि उनीहरुको मानसिकता गरिब देखियो,’ नाम उल्लेख नगर्ने सर्तमा ती स्थानीयले सीमारेखासँग भने, ‘वास्तविक गरिब सूचीमा परेनन्, हुने खाने र पहूँचवालाकै बोलवाला भयो ।’
