सरकारलाई राेएलटि नतिरेपछि याक एण्ड यति हाेटलकाे इजाजत खारेज

पर्यटन विभागले क्यासिनो सञ्चालन इजाजत पत्र र होटल स्तर वर्गीकरण प्रमाण पत्र रद्द गरिएको पत्र होटललाई पठाएको छ ।विभागका निर्देशक मोहनबहादुर जिसीले पत्रको बोधार्थ प्रधानमन्त्री कार्यालय, गृह मन्त्रालय, भूमि व्यवस्था, सहकारी तथा गरिबी निवारण मन्त्रालय र नेपाल राष्ट्र बैंकलाई दिएका छन् ।

पर्यटन मन्त्रालयले त्यस होटलको नाममा २०४८ पुस २२ मा क्यासिनो सञ्चालनको इजाजतपत्र जारी गरेको थियो ।

विभागका अनुसार उक्त होटलले आर्थिक वर्ष २०७६/०७७ सम्मको बाँकी बक्यौता, आव ०७७/०७८ को इजाजतपत्र नवीकरण दस्तुर, आव ०७८/०७९ को रोयल्टी दस्तुर गरी ४२ करोड २५ लाख ६८ हजार २ सय ५३ रुपैयाँ तिरेको छैन । वक्यौता तिर्न पटक-पटक पत्राचार र सार्वजनिक सूचना प्रकाशन गर्दा पनि रकम दाखिला नगरेकोले क्यासिनो नियमावली, २०७० को नियम १४ बमोजिम उक्त होटलको नाममा जारी भएको क्यासिनो सञ्चालन इजाजत पत्र रद्द गर्ने, होटलको पाँच (५) तारा स्तरको वर्गीकरण प्रमाणपत्र रद्द गर्ने, सम्पूर्ण अचल सम्पत्ति, बैंक तथा वित्तीय कारोबार रोक्का राख्ने निर्णय भएको निर्देशक जिसीले होटललाई लेखेको पत्रमा उल्लेख छ ।