खोटाङ।खोटाङको स्थानीय तह संस्थागत क्षमता स्वमूल्याङकनमा दिप्रुङ चुइचुम्मा गाउँपालिका पहिलो भएको छ। संघीय मामिला तथा सामान्य प्रशासन मन्त्रालयले आर्थिक वर्ष २०७७/०७८ मा गरेको स्थानीय तह संस्थागत क्षमता स्वमूल्याङकनमा ८०.५ अंकभार ल्याउदै सो गाउँपालिका पहिलो भएको हो।
शासकीय प्रवन्ध, संगठन तथा प्रशासन, वार्षिक वजेट तथा योजना व्यवस्थापन, वित्तीय एवम् आर्थिक व्यवस्थापन, सेवा प्रवाह, न्यायिक कार्य सम्पादन, भौतिक पूर्वाधार, सामाजिक समाबेशीकरणमा उत्कृष्ट अंक ल्याई दिप्रुङ पहिलो हुंदा ७८.७५ अंकभार ल्याउदै हलेसी तुवाचुङ नगरपालिका दोश्रो भएको छ।
त्यसैगरी ७०.७५ अंक सहित बराहपोखरी गाउँपालिका तेस्रो हुन सफल भएको छ। यस्तै, खोटेहाङ गाउँपालिकाले ६३.२५, साकेला गाउँपालिकाले ६३, दिक्तेल रुपाकोट मझुवागढी नगरपालिकाले ६२.५, केपिलासगढी गाउँपालिकाले ६१.५, ऐसेलुखर्क गाउँपालिकालले ६० र रावाबेंशी गाउँपालिकाले ५०.५ अंक ल्याएको छ। जन्तेढुंगा गाउँपालिकाले भने स्थानीय तह संस्थागत क्षमता स्वमूल्याङकनका लागि निवेदन दिएको थिएन।
स्थानीय तहको कार्यप्रक्रिया र उपलब्धीहरुको बारेमा लेखाजोखा गरी सबल र दुर्बल पक्षहरुको पहिचान गर्न, विकास तथा शुसासनमा रहेका कमी कमजोरीहरुको जानकारी लिन, आवधिक समिक्षाको लागि आधार प्राप्त गर्न, गाउँपालिका तथा नगरपालिकाहरुको वीचमा तुलनायोग्य सूचकहरु तर्जुमा गरी प्रतिस्पर्धात्मक सुधारमा अग्रसर गराई स्थानीय तहलाई सक्षम र प्रभावकारी बनाउन स्थानीय सरकार सञ्चालन ऐन २०७४ को दफा ८० को प्रयोजनका लागि संघीय मामिला तथा सामान्य प्रशासन मन्त्रालयले स्थानीय तह संस्थागत क्षमता स्वमूल्याङकन गर्ने गरेको छ ।
