खोटाङ। खोटाङको दिक्तेल रुपाकोट मझुवागढी नगरपालिकाले अत्यावश्यक बाहेकका सेवाहरु बन्द गरेको छ। नगर कार्यपालिका तथा मातहतका कार्यलयहरुमा कार्यरत कर्मचारीमा कोरोना भाइरसको संक्रमण देखिएपछि ६ दिनका लागि नगरपालिकाको अत्यावश्यक बाहेकका सेवाहरु बन्द गरिएको हो।
कोभिड १९ को रोकथाम तथा नियन्त्रण गर्न र थप फैलिन नदिनका लागि माघ १३ गतेदेखि माघ १९ गतेसम्मका लागि अत्यावश्यक बाहेकका सेवाहरु बन्द गरिएको नगरपालिकाले बुधबार सूचना जारी गरेर जानकारी दिएको छ।
यस नगरपालिकामा १ सय जनामा कोरोना पूष्टि भईसकेको छ। कोरोना संक्रमित दैनिक बढे पनि स्वास्थ्य सर्तकतामा भने आम नागरिकले ध्यान दिएको देखिएको छैन।
यस्तै, हलेसी तुवाचुङ नगरपालिकामा कार्यरत कर्मचारीलाई कोरोना भाईरसको संक्रमण देखिएपछि माघ १० गतेदेखि १५ गतेसम्म अत्यावश्यक सेवा बाहेकका अन्य नियमित सेवाहरु स्थगित गरिएको छ।
रावाबेंशी गाउँपालिकामा पनि कर्मचारीहरुमा कोरोना संक्रमण देखिएपछि माघ ११ गतेदेखि १७ गतेसम्मका लागि अत्यावश्यक सेवा बाहेकका अन्य सबै सेवाहरु बन्द गरिएको निमित्त प्रमुख प्रशासकीय अधिकृत बिनोद राईले जानकारी दिनुभयो। जिल्लाभर कोरोना संक्रमितको कूल संख्या १५८ पुगेको छ।
