खोटाङ । नेकपा एमाले खोटाङको सातौँ जिल्ला अधिवेशनबाट रामप्रसाद दंगाल अध्यक्षमा चयन भएको छ । दिक्तेलस्थित खोटाङ बहुउद्देश्यीय कभर्डहलमा शनिबार साँझ सम्पन्न बन्दसत्रले दंगाललाई सर्वसहमत अध्यक्षमा चयन गरेको हो ।
११९ सदस्यीय जिल्ला कार्यसमितिको उपाध्यक्षमा देवविक्रम राई, सचिवमा कुमार आचार्य तथा उपसचिवमा दीपनारायण रिजाल र सुरेन्द्रकुमार राई चयन भएको छ । श्याम पोखरेलको अध्यक्ष नौँ सदस्यीय लेखा आयोग समितिसमेत चयन गरिएको नवनिर्वाचित सचिव आचार्यले जानकारी दिए ।
दुई दिनसम्म चलेको अधिवेशनले ७७ सदस्यीय जिल्ला सल्लाहकार परिषदसमेत गठन गरेको एमाले खोटाङले जनाएको छ । नवनिर्वाचित पदाधिकारी तथा सदस्यहरुलाई एमालेका पोलिटब्यूरो सदस्य एवम् एमाले संसदीय दलका प्रमुख सचेतक विशाल भट्टराईले शनिबार साँझ नै पद तथा गोपनीयताको शपथ खुवाएको हाे।
दश स्थानीय तहका एक हजार १०० प्रतिनिधि सहभागी एमाले खोटाङको जिल्ला अधिवेशनमा राजनीतिक, साँगठानिक र आर्थिक प्रतिवेदन शुक्रबार नै पारित भएको थियो । ‘सत्तालिप्साले जन्माएको गठबन्धनविरुद्ध एक होऔँ, विकास, समृद्धि र अग्रगतिका लागि सबै एमाले एक बनौँ’ भन्ने नारासहित शुक्रबार उद्घाटन भएको अधिवेशन सर्वसहमतिको प्रयासमा ढिलोगरी सम्पन्न भएको हो ।
अध्यक्षमा सर्वसहमत चयन भएका दंगालले वि.सं. २०४६ सालमा उच्च शिक्षा अध्ययनको क्रममा आर्दश बहुमुखी क्याम्पस विराटनगरबाट राजनीति शुरु गरेकाे जनाइएको छ । दंगाल तत्कालीन बतासे गाविस तथा हालको दिप्रुङ चुइचुम्मा गाउँपालिका–४ बतासेमा वि.सं. २०२७ चैत–१४ गते जन्मिभएको हो ।
वि.सं. २०४६ सालदेखि अनेरास्ववियुको जिल्ला कार्यसमिति सदस्य भएका दंगाल पार्टी अर्धभूमिगत हुँदा नेकपा (माले)को दिक्तेल समिति सचिव तथा त्यसपछि अखिलको जिल्ला कार्यसमितिमा काम गरेकाे थियो । पार्टीको खोटाङ–विराटनगर सम्पर्क मञ्चको अध्यक्षसमेत भएका अध्यक्ष दंगालले १० नम्बर इलाकाको सचिव तथा क्षेत्रीय समन्वय समितिको सचिवको जिम्मेवारी सम्हालेकाे थियो ।
वि.सं. २०५४ सालयता पार्टीको जिल्ला कार्यसमितिमा लगातार काम गरेका दंगाल एमाले विभाजन हुँदा एमालेमै रहेको थियो । एमाले खोटाङको गत २०७२ वैशाखमा सम्पन्न छैटौँ अधिवेशनबाट उपाध्यक्षमा सर्वसहमत चयन भएका दंगाल तत्कालीन अध्यक्ष बबि चाम्लिङ नेकपा (एकीकृत समाजवादी)मा लागेपछि अध्यक्षमा मनोनित भएको थियो ।
