बैतडी । पार्टीको १४ औं जिल्ला अधिवेशनका लागि नेपाली कांग्रेस बैतडीले जिल्ला सदरमुकामका चार वटा विद्यालय बन्द गर्न पत्राचार गरेको छ । बिरेन्द्र माबि शाहीलेक, जगदम्बा माबि रानिबुंगा, दशरथचन्द माबि सुन्दरखाली र दशरथचन्द आधारभूत विद्यालय गढीलाई पत्राचार गर्दै काग्रेसले अधिवेशनका लागि चार दिन बन्द गर्न दबाब दिएको हो ।
दशरथ चन्द नगरपालिकाका मेयरसमेत रहेका कांग्रेस सभापति नरेन्द्रसिंह थापाले पत्राचार गर्दै मंसिर ४ गतेदेखि ७ गतेसम्म विद्यालय बन्द गरी भवन तथा डेस्क बेन्च सहयोग गर्न भनेका छन् ।
थापाले पार्टी र नगरपालिका दुबैका तर्फबाट विद्यालयहरुलाई पत्र लेखेको भेटिएको छ । कोरोना महामारीका कारण लामो समयसम्म बन्द रहेका विद्यालयहरु केही समय अघि मात्रै खुलेको थिए ।
दशैं र तिहारमा फेरि बन्द भएका विद्यालयहरु पार्टीको कार्यक्रमका लागि ४ दिनसम्मै बन्द गर्ने भनिएपछि यसको चौतर्फी बिरोध भएको छ ।
अनेरास्वबियूका जिल्ला संयोजक सन्तोष रानाले राजनीतिक दलले पार्टीको कार्यक्रमका लागि चार चार दिनसम्म विद्यालय बन्द गर्नु निन्दनीय भएको बताए । अर्का विद्यार्थी नेता यज्ञ भट्टले नेपाली कांग्रेस बैतडी र दशरथचन्द नगरपालिकाको विद्यालय बन्द गर्ने निर्णय तत्काल फिर्ता गर्न चेतावनी दिएका छन् ।
निर्णय फिर्ता नगरिए ‘हातमा दही जमाएर’ नबस्ने भन्दै उनले विद्यालय बन्द गर्ने निर्णयको सशक्त प्रतिरोध गरिने बताए ।
विद्यालय बन्द गर्न पत्र आएपछि जिल्ला प्रशासन र शिक्षा विकास तथा समन्वय एकाइसँग परामर्श लिने काम भइरहेको बिरेन्द्र माबि शाहीलेकका प्राचार्य कैलाश कनौजीयाले बताए । ‘प्रशासन र शिक्षा इकाईलाई के गर्ने भनेर सोधेका छौं,’ उनले भने– ‘प्रशासनबाट जे निर्देशन आउँछ त्यही गर्ने हो । simarekha.com
