सिभिलका संचालक तामाङ बिरुद्ध उजुरि दिनेकाे १४४१ पुग्याे संख्या,फेरि थपियाे म्याद संख्या

मंगलबार तामाङलाई थप १० दिन हिरासतमा राखेर अुसन्धान गर्न अदालतबाट अनुमति दिइएको छ । यो पाँचौ पटक म्याद थप भएको हो । सुरुमा ५ दिन, दोस्रो पटक १८ दिन र पछिल्ला ३ पटक १०/१० दिन गरी कुल ५३ दिन म्याद थप भइसकेको छ । म्याद थप भएसँगै हरेक दिन उनीविरुद्ध उजुरी थपिने क्रम जारी रहेको प्रहरीले जानकारी दिएको छ । उजुरीका आधारमा प्रहरीले मुलुकी अपराध संहिता २०७४ बमोजिम ठगी र संगठित अपराध निवारण ऐन २०७० बमोजिम अनुसन्धान गरिरहेको छ ।

सिभिल सेभिङ्स एण्ड क्रेडिट को–अपरेटिभ्समार्फत बचतकर्ताको रकम फिर्ता नगरेको आरोपमा प्रहरीले गत असोज १८ मा तामाङलाई पक्राउ गरेको हो । तामाङ उक्त सहकारी संस्थाका सल्लाहकार एवं पूर्व अध्यक्ष हुन् । उनी आवद्ध सहकारीले २ हजार भन्दा बढी बचतकर्ताको करिब साढे ७ अर्ब रुपैयाँ फिर्ता नगरेको उजुरीका आधारमा प्रहरीले पक्राउ गरेको हो । सिभिल सहकारीले विगत २ वर्ष (२०७६ वैशाख) देखि जम्मा गरेको रकम फिर्ता नगरेको बचतकर्ताहरुले बताएका छन् । सहकारीमा सर्वसाधारणको १ लाख देखि ८ करोड रुपैयाँसम्म बचत छ ।

सर्वसाधारणको निक्षेप फिर्ता नगरी ठगी गरेको तथा संस्थाको कर्जा पनि नतिरेपछि तामाङसहित संस्थाका १२ जनालाई सिआईबीले पक्राउ गरी अनुसन्धान गरेको छ । मंगलबार ती सबैजनालाई थुनामै राखेर अनुसन्धान गर्न म्याद थप भएको हो ।

उक्त आरोपमा सिभिल सहकारी संस्थाका अध्यक्ष केशवलाल श्रेष्ठ, प्रबन्धक भगवानबहादुर सिंह, जुनियर असिस्टेन्ट मेनेजर मायोनानी महर्जन, एलिना तुलाधर, जुनियर अधिकृत शंकरप्रसाद पाठक, असिस्टेन्ट संगित श्रेष्ठ, लेखा अधिकृत राकेश महर्जन, जुनियर सहायक प्रबन्धक बुद्धराज तामाङ, जुनियर सहायक प्रबन्धक कौस्तुभ केतन ढुंगाना र पूर्वलेखा समिति सदस्य हरिहर लामिछानेलाई समेत सिआइबीले पक्राउ गरेको छ । प्रहरीले हिनामिनामा संलग्न भएको भन्दै सिभिल होम्सका वरिष्ठ प्रबन्धक विजयविक्रम शाहलाई पनि पक्राउ गरेर हिरासतमा राखेको छ ।

०५७ सालमा स्थापना भएको यो सहकारीमा करिब साढे २ वर्षअघि समस्या सुरु भएको थियो । अन्य सहकारीभन्दा महँगो ब्याज दिएर संस्थाले साढे सात अर्बभन्दा धेरै निक्षेप संकलन गरेको थियो । सोही अवधिमा संस्थाले करिब ८ अर्ब रुपैयाँ सिभिल होम्सलाई मात्र कर्जा दिएको छ । जुन कानुन विपरित हो