काठमाडौं । गत शनिबार भाई टिकाको दिन त्रिभुवन विमानस्थलस्थित मदिराले लठ्ठिएर भन्सार कर्मचारीमाथि हातपात गर्ने पर्यटन बोर्डको सिइओको बचाउमा बोर्डकै उच्च तहका कर्मचारी लागेका छन् ।
मदिरा पिएर विमानस्थलस्थित भंसार विभागका कर्मचारी सुमन थापामाथि बोर्डका सिइओ धनन्जय रेग्मीले अवैध रुपमा ल्याएको ६ बोत्तल मदिरा भित्र्याउन नदिएको भन्दै झापड हानेका थिए ।
थप्पडा हान्दै रेग्मीले ‘म को हो चिनेको छस् ? देश चलाउने मान्छे हुँ’ भन्दै धम्काएका थिए । उनै सिइओ रेग्मीको बचाउ गर्दै पर्यटन बोर्डले विज्ञप्ति निकालेको हो । बोर्डकी प्रवक्ता नन्दिनी लाहे थापाले लज्जाष्पद रुपमा विज्ञप्ति निकाल्दै घटनाको ढाकछोप गर्ने प्रयास गरेकी हुन् । जबकी रेग्मीलाई तालुकदार निकाय पर्यटन मन्त्रालयले ३ दिने स्पष्टिकरण सोधेको छ । रेग्मीले समेत सामान्य कुटपीट भएको र आफूले मदिरा पिएको स्विकार गर्दै आएका छन् । तर, बोर्डले भने लज्जास्पद रुपमा लेटरप्याडको समेत दुरुपयोग गर्दै रेग्मीको बचाउ गरेको छ ।
मदिरा पिएर लफडा गर्ने रेग्मी विरुद्ध सञ्चार माध्यमले खबर छापेको भन्दै उल्टै सञ्चारमाध्यम विरुद्ध नै थापाले झूटो आक्षेप लगाएकी छिन् । सञ्चारमाध्यमले हुँदै नभएको खबर छापेको समेत उनको आरोप छ । तर, सिइओ रेग्मीले भने घटना भएको स्विकार गर्दै विमास्थलबाटै शक्ति केन्द्र अर्थात अर्थमन्त्री जनार्दन शर्मालाई समेत फोन गरेको बताउँदै आएका छन् ।
