सहकारीको अरबौं रुपैयाँ निक्षेप अपचलन गरेको अभियोगमा प्रहरीको केन्द्रीय अनुसन्धान ब्युरोद्वारा समातिएका सिभिल बैंकका अध्यक्ष इच्छाराज तामाङले हिरासतमा ३५ रात बिताएका छन् । उनीसँगै अरु ११ जनाले पनि दशैं र तिहारसमेत त्यहिँ बिताएका हुन् । दशैं अगाडिदेखि उनीहरु सबै खोरमै छन् ।
पक्राउ परेका १२ जनामध्ये १० जना सीआईबीको खोरमा छन् । दुई जना महिला कर्मचारीलाई भने प्रहरीको महाराजगञ्ज वृत्तको हिरासत कक्षमा राखिएको छ । दशैं र तिहारको समयमा पनि उनले प्रहरीलाई अनौपचारिक रुपमा म तिर्छु, मिलाउँछु भनेर वचन दिएको बताइन्छ । उनी र उनको समूहविरुध्द झण्डै पाँच अर्ब रुपैयाँ बराबरको निक्षेप अपचलन गरेको दाबी परेको छ । ११ सयभन्दा बढीले लिखित उजुरी नै दिएका छन् ।
“इच्छाराजलगायतका १० जना पुरुष अभियुक्तहरु एउटा ठूलो हिरासत थुनुवा
कोठामा लाइन लागेर सुत्ने गरेका छन् ।”
उक्त रकम तामाङले सिभिल होम्समा र अन्यले विभिन्न पेशा व्यवसायमा लगाएको देखिन आएको छ । अन्यले पनि जग्गा, घर, क्रसर उद्योगमा लगानी गरेको प्रहरीले प्रमाण फेला पारेको छ । तर सहकारीको पैसा लगेर बनाएको सिभिल होम्सका घर बेचेर आएको पैसो भने उनले कौडी पनि देखाएका छैनन् । प्रहरीको अनुसन्धान टोली त्यहि पत्ता लगाउन लागिपरेको बताइन्छ ।
उनले सबैको रकम फिर्ता गर्छु भने पनि व्यवहार मिलाउने खाका दिन सकेका छैनन् । अरुले पनि त्यस्तै भनेका छन् तर यसरी तिर्छौं भनेर कसैले पनि आश्वस्त हुने योजना दिन नसकेको प्रहरीले बताएको छ । हुन तः पक्राउ परेका सबैको बैंक खाता र श्रीसम्पत्ति सम्पत्ति शुध्दिकरण अनुसन्धान विभागले रोक्का गरिसकेको छ ।
“हिरासतमा रहेकामध्ये अधिकांशले उच्च रक्तचापको औषधि सेवन गरेको देखिन्छ ।”
तामाङले आफूसँग अपचलन गरिएको अर्बौं रकम नदेखाए पनि डिभोर्स गरेकी श्रीमतीको नाममा भने जग्गा जोडेको भेटिएको छ । उनले सँगै बस्ने तर कागजमा पूर्वपत्नीको दर्जा दिएकी श्रीमतीको नाममा काठमाडौंका ठाउँ ठाउँमा जग्गा जोडेका छन् । जोरपाटी नजिकै एकै ठाउँमा ४५ रोपनी जग्गा लिएको देखिन्छ । उक्त जग्गाको मूल्य झण्डै एक अर्ब रुपैयाँ हुन आउँछ ।
पक्राउ परेका केही सामान्य कर्मचारीबाहेक अन्य कर्मचारी र पदाधिकारीले समेत श्रीमती, आफन्त, ससुरा र सासूको नाममा घर,जग्गा,सेयर किनेको देखिन आएको छ ।
हिरासतमा रहेका कसैलाई पनि मोबाइल,इन्टरनेट चलाउन दिइएको छैन । शुरुमा तामाङलाई प्रहरीको सोह्रखुट्टे वृत्तमा राखिएको थियो । अहिले सीआईबीको हिरासतमा लगिएको छ । अहिलेसम्म उनीहरुलाई आफ्ना कानुन व्यवसायी र परिवारका सदस्यसँग मात्र भेट गर्न दिइएको छ ।
“उनले सँगै बस्ने तर कागजमा पूर्वपत्नीको दर्जा दिएकी श्रीमतीको नाममा
काठमाडौंका ठाउँ ठाउँमा जग्गा जोडेका छन् ।”
यसबीच उनीहरु कोही पनि बिरामी नपरेकाले अस्पताल लानु परेको छैन । तर हिरासतमा रहेकामध्ये अधिकांशले उच्च रक्तचापको औषधि भने सेवन गरेको देखिन्छ ।
सीआईबीको हिरासतमा रहेका इच्छाराजलगायतका १० जना पुरुष अभियुक्तहरु एउटा ठूलो हिरासत थुनुवा कोठामा लाइन लागेर सुत्ने गरेका छन् । janaaastha.com
